DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba krime danu simples, neebe mak komete husi arguidu nain tolu ho inisial AdF, RS no DdC hasoru ofendidu inisial MS iha Munisipiu Aileu.
Prova autu nia laran iha indisius hatudu katak, iha loron 02 fulan Novembru tinan 2025, haleu oras tuku 17h, iha Aldeia Dacilelo, Suku Tulatakeu, Postu Administrativu Remexio, Munisipiu Aileu, ofendidu MS nia motorizada ho marka Honda, modelu Verza ho xapa matrikula C.4133 TL hetan estragus hosi arguidu sira ho naran AdF, RS no arguidu DdC.
Testemuna JS haree arguidu AdF no RS mak lori fatuk hodi tuku ba iha motorizadas nia tanki mina, body, lampu boot no lampu indikador.
Arguidu DdC mos lori fatuk hodi tuda kona iha ofendidu nia motorizadas nia parte bodi nian hodi halo kabetok.
Konsekuensia direta husi arguidu sira nia hahalok ida nee, halo ofendidu sofre prejuizu ho osan US$ 500.
Arguidu AdF, RS no arguidu DdC halo sira nia hahalok ida nee ho forma livre no deliberada, ho intensaun no forsa hamutuk hodi tuda no lori fatuk tuku iha ofendidu nia motorizadas hodi kauza estragus hodi kontra ofenddiu nia vontade rasik hanesan sasan nain, maibe arguidu sira hakarak halo nafatin tuir saida maka arguidu sira hakarak no arguidu sira mos hatene hela katak, ida nee lei bandu no sei hetan kastigu tuir lei.
Ho hahalok sira nee hotu konsidera, arguidu AdF, RS no arguidu DdC hanesan ko autor material ho forma konsumadu ba pratika krime 1 (ida) Dano simples neebe previstu no punidu tuir artigu 258 husi Kodigu Penal.
No kazu nee rasik Ministeriu Publiku imputa arguidu nain-tolu, maibe arguidu DdC hili direitu nonok, no arguidu nain-rua hili direitu koalia.
Hatan ba akuzasaun nee, arguidu AdF deklara, faktus sira neebe mak MP duun ba arguidu nee balun loos no balun sala, tanba iha momentu iha loron 2 fulan Novembru tinan 2025 maizumenus Oras tuku 5:00 loraik nee, arguidu sira duni ofendidu tanba ofendidu lori ai-suak baku arguidu nia Tiu to mate, tanba nee arguidu sira nervozu hodi ba baku rahun ofendidu nia motor, tanba buka ofendidu la hetan.
Arguidu dehan, iha momentu nee arguidu sira la baku ofendidu, no atu baku rahun ofendidu nia motor, maibe la konsege baku rahun no arguidu la haree se mak baku rahun motor nee, tanba iha momentu ema barak mak iha neeba.
Arguidu deklara, kazu nee akontese tanba ofendidu lori ai-suak baku arguidu nia Tiu, no baku tiha ofendidu halai sees husi arguidu sira, tanba nee arguidu sira duni tuir maibe la hetan ofendidu no hetan deit ofendidu nia motor neebe para iha ofendidu nia uma oin, tanba ofendidu ho arguidu sira Bairu ida.
Arguidu dehan, sese mak baku rahun ofendidu nia motor arguidu la haree, tanba loron matebian entaun ema barak.
Arguidu dehan, arguidu nia alin ho inisial RS mak lori fatuk atu tuda motor, maibe arguidu mak tahan no hateten katak labele baku rahun ofendidu nia motor, maibe buka ema deit, nune arguidu la konsege tuda.
No arguidu RS deklara katak, iha akontesimentu nee arguidu mos iha oin hotu, maibe laos arguidu mak baku rahun motor nee, tanba iha akontesimentu ema barak mak partisipa.
Arguidu esplika, bainhira arguidu rona katak ofendidu lori ai suak baku arguidu nia Tiu, arguidu halai lori fatuk atu tuda ofendidu nia motor, maibe arguidu nia Aman mak ba dehan labele estraga sasan maibe buka ema deit.
Hafoin rona tiha deklarasaun sira nee, Tribunal deside muda ba loron seluk hodi rona sasin nia deklarasaun.
Iha audensia Julgamentu nee, prezide hosi Juiz Singular estajiariu nain ida, Ministeriu Publiku reprezenta husi Prokuradora estajiariu nain ida, no sira hetan asistensia legal hosi Defensor Publiku estajiariu nain ida.
(ter)
