DILI, STLTIMORLESTE.com – Relasiona ho kazu omisidiu Neglijente neebe rezulta Zizelma Maria Fatima Verdial Gonsalves lakon vida, ikus mai Tribunal Rekursu (TR) hasai ona desizaun hodi kondena arguidu MSdC ho tinan 4 fulan 6 iha prizaun.
Tuir Jurista Sergio Dias Quintas katak, kazu Zizelma nee interesante, tanba halo rejulgamentu husi Tribunal Primeira Instansia, husi rejulgamentu iha Tribunal Primeira instansia manten desizaun hafoin ba iha Tribunal Rekursu mak foin muda desizaun rekorrida hodi aplika pena efetiva ba arguidu.
“Interesante tanba tuir hau nia hare foin pela primeira vez arguidu ida pratika krime Neglesensia hetan pena efetiva, entaun nee sai referensia ba desizaun judisial tuir mai,” dehan Sergio ba STL iha Kaikoli, Segunda (27/04/2026).
Nia hatutan, kazu ida nee desizaun tranzitadu julgadu tiha ona, arguidu nia kualidade muda ba kondenadu, maibe liu husi nia defesa bele halo rekursu extraordinariu, maibe sei la muda nia kualidade hanesan kondenadu.
Sergio esplika, normalmente rekursu extraordinariu nee sei la muda desizaun husi Tribunal Rekursu, bainhira laiha prova foun ruma.
Antes nee, TR iha loron 26 fulan Marsu tinan 2026, liu husi numeru NUC:0007/26.TRDIL Juiz konseleru TR kompostu husi Juiza, Jacinta Corea da Costa hanesan relatora, Juiz Deolindo Dos Santos, Maria Natercia Gusmao Pereira, julga prosedente no kondena arguidu MCdC hanesan autor material ba krime Homesidu Neglijensia Groseira iha artigu 140 husi Kodigu Penal, ho kastigu tinan 4 fulan 6 prizaun, no autor material Kondusaun sem karta artigu 270 husi Kodigu Penal ho pena prizaun fulan 12. Maibe ikus mai akomula, hodi kondena arguidu ho pena unika tinan 4 fulan 6 iha Prizaun. No selu mos indimizasaun sivil 5 mil.
Depois desizaun nee sai, notifika defeza iha loron 01 fulan Abril tinan 2026.
Tuir Advogadu Privadu, Americo Martins katak, depois simu notifikasaun ba iha desizaun nee, nia parte haruka kedan kedan Rekursu Exraordinariu ba iha TR.
Iha loron 23 fulan Abril tinan 2026, Autoridade Seguransa, Polisia Nasional Timor Leste (PNTL)liuhosi Diresaun Servisu Investigasaun Kriminal (DSIK) ezekuta desizaun Tribunal Judisial Primeira Instansia Dili (TJPID), detein kondenadu inisial MSdC kumpri pena prizaun tinan-haat fulan neen.
Iha prosesu ezekusaun nee autoridade DSIK too iha kondenadu nia rezidensia, aprezenta desizaun Tribunal Judisial Primeira Instansia Dili (TJPID), neebe rejistu no numeru prosesu NUC NUC: 0285/25.TRDIL, ba familia ho kondenadu rona tiha ikus mai sira koopera diak, ekipa DSIK tula kondenadu transporta kedan mai iha edifisiu DSIK iha kuartel Jeral PNTL Kaikoli hodi halo identifikasaun no sertifikasaun molok lori ba estabesimentu Prizional Bekora hodi kumpre pena tinan-haat fulan neen.
Prosesu nee, prezinde husi Juiz Jose Gonsalves, Ministeriu Publiku reprezenta husi Prokurador Rafael Gusmao no asistente Eustaquio Guterres, no arguidu hetan asistensia legal husi Advogadu Privadu Americo Martins.
(ter)
