DILI, STLTIMORLESTE.com – Kazu detensaun estranjeiru nain lima (5) neebe envolve iha trafiku droga iha Segunda (27/04/2026) dada atensaun publika. Akademista no Observador Politika sira husu ba Ministeriu Publiku (MP) no Tribunal atu aplika kastigu neebe rigorozu no todan, hanesan meiu atu prevene kriminal sira seluk.
Akademista UNTL, Jacarias dos Santos afirma katak, droga hanesan krime neebe destroi jerasaun foinsae no estabilidade sosial.
“Justisa neebe la fo pena todan ba trafiku droga bele fo sinal falsu ba kriminal falsu katak, Timor Leste mak fatin neebe fasil atu halao atividade ilisita. Tribunal tenke uza kodeku penal atu aplika kastigu neebe koresponde ba impaktu krime nee nia,” hatete Jacarias ba STL, iha Kaikoli, Dili, Kuarta (29/04/2026).
Nia sublina, sistema seguransa presiza modernizasaun, hodi evita rai laran sai alvu ba trafiku droga. Investigasaun neebe Diresaun Servisu Investigasaun Kriminal (DSIK) halao hela dadaun sai pontu fundamental, atu deskobre ligasaun entre grupu nee ho rede sira iha rai liur.
Iha parte ketak Observador Politika, Manuel Martins fo hanoin katak kazu nee hanesan teste ba kredibilidade sistema Judisial nian. Bainhira kriminal estranjeiru sira la hetan kastigu neebe tuir lei, nee bele hamenus konfiansa Publiku ba Estadu.
“Ami hein katak laos deit investigasaun mak lalais, maibe julgamentu neebe imparsial. Pena todan mak dalan ida atu proteje soberania rai nian husi infiltrasaun rede kriminal internasional,” dehan nia.
(car)
