DILI, STLTIMORLESTE.com – Ministeriu Publiku (MP) iha alegasaun ba krime Arma Branka no Omisidiu Simples, solisita ba iha Tribunal koletivu atu kondena arguidu ho inisial CS pena prizaun tinan 20.
Iha alegasaun nee Prokuradora prosesu Bemvinda do Rojario deklara katak, arguidu konfesa ba faktus neebe iha. Arguidu deklara katak, foti desizaun hodi sona vitima mate, tanba vitima soke mate arguidu nia maun.
Prokuradora deklara, arguidu nia aktu nee halo ho intensaun. Tanba nee MP konsidera, arguidu nia aktu prienxe ba iha elementu krime rua, Omisidiu Simples no Arma Branka.
Tanba nee, MP la iha duvidas, mantein ho akuzasaun neebe iha, solisita ba iha Tribunal Koletivu atu kondena arguidu tinan 20 iha prizaun.
Aleinde nee, Defeza arguidu nian Laura Valente deklara katak, arguidu konfesa imparsial ba faktus, arguidu mos arepende ba nia hahalok, foin primera vez mai iha Tribunal.
Ho nunee, Defeza arguidu nian husu Tribunal tetu deklarasaun sira hotu, atu aplika pena neebe kmaan no justu ba arguidu.
Rona tiha alegasaun, Tribunal adia ba loron seluk hodi rona desizaun.
Iha sala julgamentu laran, arguidu deklara katak, faktus neebe iha loos hotu kedan.
Arguidu deklara momentu neeba lezadu lori kareta soke mate arguidu nia maun, ho ida nee mak arguidu halai ba ho kondisaun lanu lori tudik sona mate lezadu.
Arguidu rekonhese, lori tudik modo mak sona ba iha lezadu.
Arguidu deklara, arepende tebes ba nia hahalok nee, no promete ba oin sei la halo tan hahalok nee.
Iha indisus sufisiente katak, iha loron 25 fulan Agostu tinan 2025 iha tuku 2:00 dader, vitima Mario Salsinha lori karreta pickup Mitsubishi, xapa matríkula 53-584TLs, husi Dili ba Letefoho, hamutuk ho Estanislau Maia Salsinha no Agostinho Ximenes Pinto, neebe tuur iha oin, no Adriano Deus, neebe tuur iha kotuk.
Bainhira too iha Madiu Gleno Ermera, kareta pick-up neebe vitima Mario lori soke husi motor neebe lori husi Crispim Soares, neebe hela iha fatin refere.
Agostinho Ximenes rona hakilar, “oho tiha, oho tiha. Hafoin, sira nain tolu tun husi kamioneta no halai ketak ketak, husik hela vitima Mario iha fatin akontesimentu.
Momentu nee kedas arguidu CS, partisipa hela tau fatuk dahuluk ba konstrusaun uma lulik “Uma Lulik Tau As,” bainhira rona informasaun katak kamioneta ida halai soke nia maun Crispim Soares.
Tuir mai, arguidu tuir kareta ba fatin refere, armadu ho tudik, no haree vitima Mario toba ho oin tun iha rai (toba taka rabat), tanba hetan asaltu husi ema deskonesidu sira. Arguidu sona nia iha kotuk laran, lezadu fila kotuk no toba ho kotuk. Tuir mai arguidu sona nia dala barak iha nia kabun no husik hela tudik iha fatin akontesimentu.
Arguidu fila ba uma iha Uma Lulik no hasoru Abrao Soares Exposto iha dalan klaran. Abrão leno nia lampu telemovel ba arguidu, haree katak arguidu hatais jaket mean, iha tudik iha liman, nakonu ho raan, no husu ba nia, “tan sa kaer fali tudik nee?” Arguidu hatan, “los tiha ona, hau atur tiha ona.”
Nunee, Abrão informa kedas ba polisia ba iha fatin akontesimentu, atu nunee bele halo avaliasaun ba kondisaun vitima sira, Mario no Crispim Soares.
Tanba arguidu nia hahalok vitima Mario Salsinha, hetan sona dala 12 iha isin iha fatin akontesimentu.
Arguidu atua ho livre no ho objetivu espesifiku, uza tudik nee laos ba objetivu domestiku, maibe atu hasai vitima nia vida, rezultadu neebe nia hanoin.
Arguidu atua ho livre no ho objetivu espesifiku, armadu ho tudik, sona dala barak iha vitima nia isin, hodi hamosu nia mate, rezultadu ida neebe nia hanoin.
Nia mos hatene katak, ninia hahalok nee bandu no bele hetan kastigu kriminal.
Nunee arguidu nudar autor ba krime rua neebe konjuga ba malu, hanesan tuir mai nee, Arma Branka tuir artigu 20 numeru 1 husi Lei numeru 5/2017, loron 19 fulan Abril, no krime Homisidiu Simples, tuir artigu 138 husi Kodigu Penal.
Audensia julgamentu nee, prezide husi Juiz Kolektivu, Fransisca Cabral, Jose Escurial, Juiz estajiadu nain ida, Ministeriu Publiku reprezenta husi Prokuradora Bemvinda Do Rojario, arguidu hetan asistensia legal husi Defensora Publika Laura Valente.
(ter)
