DILI, STLTIMORLESTE.com – Iha tempu neebe ukun nain ka elite sira goza privileiju hodi semo ho aviaun ba estranjeiru. Realidade iha rai okos povu nafatin moris terus hodi dudu kareta iha tahu laran. Diferensia neebe luan nee sai hanesan retratu ida kona-ba distansia sosial no moris neebe haketak malu tebes iha Timor Leste (TL).
Foin lalais nee movimentu ukun nain sira nian ba rai liur ho rajaun servisu Estadu sai diskusaun boot iha publiku nia leet. Tanba ho fasilidade kompletu no osan diaria neebe boot, viajen hirak nee lao ho privileiju tebes, maibe realidade nee la hanesan situasaun neebe povu hasoru iha Munisipiu sira hanesan Ermera, Viqueque no Bobonaro liu liu iha tempu udan.
Iha neeba estrada sira nakfila ba kolan tahu neebe impede movimentu transporte. Motorista no pasajeiru sira, inklui inan isin rua no labarik eskola, tenke luta ho esforsa tomak hodi dudu kareta sira neebe mout hela iha tahu laran, enkuantu lian aviaun nian semo aas liu sira nia leten.
Kondisaun estrada neebe la diak nee laos deit fo difikuldade ba viajen, maibe mos hamate ekonomia povu nian hanesan produtu kafe no aifuan sira barak mak dodok deit iha foho, tanba kareta labele tama ba foti sasan, nunee mos pasiente neebe presiza assistente urjente dala barak enfrenta perigu, tanba kareta tula sira tenke para deit iha tahu klaran.
Akademista UNTL, Eduardo da Silva nia haree ida nee hanesan injustisa dezenvolvimentu, tanba ukun nain sira kolia progresu iha lalehan no sala konferensia VIP iha estranjeiru, povu iha foho lolon sira tenke uza fali teknik manual hodi dudu sira nia moris ba oin husi tahu laran.
“Ita haree ho matan rasik oinsa motorista no pasajeiru sira luta dudu kareta iha tahu laran, enkuantu ukun nain sira goza fali fasilidade luxu hodi semo ba rai liur. Ida nee laos deit kestaun infraestrutura maibe kestaun moralidade iha politika dezenvolvimentu,” dehan Eduardo ba STL, iha Kaikoli, Díli, Tersa (05/05/2026).
Tuir nia hanoin Governu tenke iha sensibilidade neebe aas bainhira osan Estadu gasta barak liu ba privileiju ukun nain ka elite nian duke sosa material diak hodi hadia estrada rural ida nee hatudu katak Governasaun doko husi povu.
Nia mos kestiona kualidade estrada neebe fasil estraga, hodi husu ba Governu atu labele foka deit ba viajen diplomatika, maibe tenke tun ba terrenu hodi fiskakiza obra sira neebe povu uza.
“ Dignidade ita nia nasaun nian laos haree deit husi oinsa ukun nain sira semo ho aviaun ba estranjeiru, maibe haree liu husi kualidade moris povu nian iha foho lolon sira neebe livre husi tahu laran,”hatete Akademista nee.
Enkuantu antes nee Ministru Obras Publika, Samuel Marcal kompromete Governu sei hadia estrada neebe aat iha area rural, tuir orientasaun Primeiru Ministru (PM), Kay Rala Xanana Gusmão atu aselera distribuisaun produtu komunidade sira nian, no hadia asesu servisu saude, edukasaun, transporte emerjensia ho seluk tan.
(car)
