DILI, STLTIMORLESTE.com – Labarik sira kontenti ho atividade oratoriu neebe halao iha loron Domingo, neebe organiza husi Frater Saleziano Dom Bosco no animador no animadora sira iha kada oratoriu neebe lokaliza iha Dom Bosco Comoro nian.
Oratoriu sai nuudar uma, igreja, kampu no eskola hodi halibur labarik no foin sae sira hotu. Liu husi atividade nee labarik no joven sira bele konese diak liu Santo Dom Bosco neebe nudar aman no mestri bá labarik no foin sae sira.
Tuir Oratoriana Amelia da Costa husi Eskola Sao Pedro katak, nia kontenti tuir atividade oratoriu neebe, tanba liu husi atividade nee lori nia bele konese Liu Santo Dom Bos nomos santo ho santa sira neebe fiar no fo sira nia aan ba Maromak. Aleinde nee mos ho jogu oi-oin neebe Frater sira fo halo sira kontenti hela deit. Tanba nee iha loron Domingo nia la gosta iha uma, maibe nia sempre ba tuir atividade oratoriu iha Eskola Sao Pedro.
“Iha Domingo hau lakohi iha uma, depois sai misa han meudia deskansa no loraik mai tuir oratoriu iha Eskola Sao Pedro, tanba hau oratoriu husi Sao Pedro nian. Hau gosta tebes mai tuir oratoriu, tanba bele hatene no konese Diak Liu historia Dom Bosco no musika Sira Kona bá Dom Bosco nian. Nunee mos aprende buat barak husi Frater no bin animadora sira, neemak halo hau ho kolega sira mai hela deit,” dehan nia bá STL iha Dom Bosco, Kuarta (06/05/2026).
Nia katak, iha oratoriu nee hasoru kolega barak ho jeitu oioin nomos konese Frater no Amu sira husi Dom Bosco nian. Bainhira too loron oratoriu nian, sempre halo festa iha Dom Bosco. Iha neemak oratoriano no animadora husi kada oratoriu sira iha Komoro hatudu sira nia animasaun oi-oin.
Nunee mos Oratoriana Maria Auviliadora Gomes husi Oratoriu Rai kotuk hatete, kontenti tebes tuir oratoriu, tanba jogos barak, iha kolega barak, kolega mos ho frater sira liu husi oratoriu bele hatene no konese Santo Dom Bosco, nunee bainhira rona Santo nee historia furak neebe nia halo antes nia mate, halo oratorianu sira kontenti hodi hakarak mai tuir hela deit oratoriu iha loron Domingu.
Tuir Animadora Eskola São Oratoriu, Milze Rebelo katak, oratoriu sai nudar uma, igreja, kampu no eskola hodi halibur labarik no foin sae sira. Oratoriu nudar uma hodi halibur hamutuk sai familia Ida deit, nudar igreja hodi fo kaquese bá labarik sira, nudar kampu hodi halo Jogos no nudar eskola hodi sai fatin aprende bá labarik sira.
Nai dehan, fofoun seidauk sai animadora sei hanesan oratoriana iha oratoriu Sai Pedro. Buat neebe halo nia hakarak tuir oratoriu neemak tanba jogos no animasaun oioin neebe fo husi Frater no animador/a. Fofoun nee Liu husi jogos sira, depois tuir no rona historia Santo Dom Bosco nian halo laran nee hakarak atu halo tuir no aprende tuir ain fatin Som Bosco nian neebe anima labarik no joven sira. Tanba nee liu husi oratoriu agora sai hanesan animadora hodi kontinua anima labarik kiik sira.
“Kontenti tebes anima labarik kirim sira neebe mai ho karater oioin, ami animador sira mos tenke uza maneira oinsa para bele anima labarik sira mak tenki pasensia, dala ruma mos hirus tanba labarik balun nakar, maibe lalais deit hamnasa fali ho sira, neemak fungsaun animadora nian,” dehan nia.
Nia hatutan, iha oratoriu alende halo animasaun bá labarik sira, tuir mos formasaun oioin neebe halao iha Dom Bosco nomos atividade neebe relevante ho joven nian sira nian.
(dom)
