DILI, STLTIMORLESTE.com – Komisaun Anti Korupsaun (KAK) halo monitorizasaun no inspesaun ba reabilitasaun Drainagen Mota Aitarak Laran.
Tuir Komisariu Adjuntu Servisu Apoiu no Kooperasaun, Miguel Acasio Farria katak, bazeia ba programa ida nee liu husi unidade prevensaun, liu husi monitorizasaun no inspesaun ba projeitu sira neebe emerjensia no projeitu sira neebe tuir tenderizasaun normal.
“Horiseik ami halo monitorizasaun no inspesaun ba projeitu iha Ailok Laran Mota Maloa nia leten, ohin ami mai fali iha mota ain identifika katak, projeitu nee paradu tanba problema sosial neebe agora daudaun husi parte Ministeriu Finansa nian seidauk rezolve, tanba diresaun ida iha Ministeriu Obras Publiku (MOP) halo identifikasaun atu rezolve problema nee maibe too agora seidauk rezolve,” dehan nia ba jornalista sira iha Farol, Kuarta, (06/05/2026).
Nia hatutan, iha kestaun seluk mak bee, dala ruma sulin mai boot no mos udan mak halo projeitu nee paradu too agora, maibe kompanhia nafatin halao servisu, tanba nee kompanhia husu ba iha Estadu atu rezolve problema sosial neebe iha, husu atu estende tan kontratu atu kompanhia halao servisu, tanba kompanhia la abandona projeitu.
Esplika tan, problema neebe kompanhia hasoru mak problema saida, tuir lo-loos Estadu mak rezolve, maibe too agora seidauk rezolve, no kompanhia hatoo ona pedidu ba iha MOP, maibe too agora seidauk iha informasaun, tanba nee sira husu estende tan kontratu atu kompania halao servisu.
Iha fatin hanesan, Tekniku husi Unidade Inspesaun Verifikasaun Pagamentu, Marcelino Soares dehan, sei kolabora ho diresaun sira hodi bele aselera prosesu nee.
“Prezensa husi KAK nian mai rekolha informasaun ruma ba projeitu ida nee, problema projeitu ida nee paradu hela tanba problema sosial sei prosesu hela iha diresaun identifikasaun no planeamentu nian, sei kolabora nafatin ho diresaun sira nee hodi aselera lalais prosesu sira nee, atu kompanhia bele kontinua halao servisu,” dehan nia.
Nia dehan, kona-ba uma kain hira mak atu indemniza, nia parte la iha konhesimentu, husi Diresaun MOP mak hatene. Maibe konaba projeitu nee halo ona pagamentu, hamutuk 38% husi orsamentu US$ 1,684.104.48.
Aleinde nee, Tekniku Kompanhia RIDI START, Antonio Gomes afirma, projeitu paradu laos problema mai husi kompanhia, maibe husi Diresaun MOP nian neebe seidauk buka solusaun ba iha problema sosial balu.
“Ami hasoru iha distansia ida neebe kloot servisu paradu ona, no rai ida neebe eksa kuandu book nia hanesan masin sulin mas ami konsege menan tiha husi parte ida nee, maibe paradu agora nee iha diresaun MOP laos kompania, se husi diresaun MOP mak buka ona solusaun, projeitu sei la paradu,” dehan nia.
Informa tan, tuir lo-loos projeitu nee termina iha tinan 2025, maibe sira hasoru problema hanesan kuandu iha tempu udan la fo fatin ba sira atu servisu, mekanizmu servisu maka hadia fatin sira neebe ses husi be laran.
Akresenta tan, konaba uma kain hirak maka atu indimiza, nia parte la hatene tanba nee kabe ba iha diresaun MOP nian.
Tuir informasaun neebe iha, projeitu nee konaba rehabilitasaun Drainage Mota Aitarak Laran. Husi kompania RIRI START UNIPESSOAL, LDA, ho total orsamentu hamutuk US$ 1,684.104.48. Konstrusaun hahu iha 01/07/2024 no tuir kontratu sei termina iha loron 01/07/2025.
(ter)
