DILI, STLTIMORLESTE.com – Reitor Universidade Nasional Timor Lorosae (UNTL) ho estrutura halao enkontru ho Prezidente Republika Jose Ramos Horta, hodi aprezenta sira nia estrutura nomos husu apoiu ruma ba Xefe Estadu.
Bainhira remata hasoru malu, Reitor Universidade Nasional Timor Lorosae (UNTL), Joviano Antonio da Costa ba jornalista sira iha Palasiu Prezidensial Nicolau Lobato, Bairo Pite Kuarta (06/05/2026) hatete, ohin reitor hamutuk ho estrutura foun neebe kompostu husi Vise-Reitor no Pro-Reitor sira, halao sorumutu kortezia ho Prezidente Republika hodi relata estrutura ba Xefe Estadu.
“Reitor UNTL hamutuk ho hau-nia estrutura foun, ekipa reitoria neebe inklui Vise reitor no Pro-reitor UNTL. Ami toma responsabilidade nee durante fulan tolu liu ba. Iha momentu nee, ami foin mak toma pozisaun toma de pose nuudar estrutura, nuudar jestor, no nuudar lideransa ba UNTL hotu-hotu hatene UNTL(Universidade Nasional Timor Lorosae) ba períodu tinan lima nian. Too agora, foin fulan tolu mak ami mai nuudar jestor iha UNTL. Bainhira ami simu pose, klaru katak ami mos tenke aprosima an ba Prezidente Republika para bele hatoo ami-nia ezistensia, nuudar lideransa, no nuudar jestaun foun iha UNTL,” dehan Reitor UNTL.
Reitor hatete, hahu husi neeba komesa halo aproximasaun mai iha palasiu prezidensial nee rasik maibe komu ajenda Prezidente nian okupadu, entaun iha momentu ida-nee mak foin hetan oportunidade para bele mai hasoru malu ho Prezidente Republika.
“Objetivu prinsipal mak atu hatoo ami-nia kumprimentu institusional ba iha Prezidente Republika. Katak dadaun nee hau ho hau-nia ekipa mak nuudar Reitor no jestor foun iha UNTL ida nee mak ami nia objetivu prinsipal tantu iha ami nia sorumutu depois ami mos halo diskusaun ba asuntu importante seluk neebe liga ho jestaun instituisional iha UNTL nee rasik,” katak nia.
Nia hatete, klaru Prezidente Republika nuudar aman ba nasaun Timor-Leste presiza mos ninia hanoin ninia kontribuisaun hodi bele fo ba sira atu lori hodi jere insituisaun agora neebe sira lidera ba.
“Aleinde nee liga ba oinsa para bele dezenvolve infraestrutura balun iha UNTL karik relata ba iha nai Prezidente para nia bele fo apoiu ba ami para ami bele lao ba oin ida nee mak ohin ami hatoo.” Katak nia.
Aleinde nee, halo mos halo diskusaun ba kestaun importante seluk neebe iha ligasaun ho jestaun institusional UNTL nian. Prezidente Republika nuudar “aman” ba nasaun Timor Leste, sira presiza tebes nia hanoin no kontribuisaun hodi bele lori no dezenvolve instituisaun neebe sira lidera daudaun.
“Iha diskusaun komo ami instituisaun ida neebe liga liu ba iha formasaun estudante a nível universitariu bahasa dehan (higher education), edukasaun nivel altu entaun Prezidente fo tawaran liga liu ba apoiu finansial. Klaruke Prezidente republika primeiru pessoa iha nee kuaze instituisaun ONG ou apoiu kompanias no mos estadu barak iha mundu liga mai Prezidente atraves de Prezidente apoiu sira nee bele mos kanaliza ba iha instituisaun liu-liu edukasaun ninian entaun espesialmente ba UNTL nee rasik,” katak nia.
Prezidente Republika Jose Ramos Horta ninia apoiu primeiru mak hakarak fo ajuda finansialmentu balun liga ba bolseiru ba estudante iha UNTL maibe nia mekanizmu depois sei planu sei diskute a nivel universitariu no depois liga mai Prezidente maibe Prezidente nia pedidu mak nee tenke aselera lao lalais para bele kanaliza ajuda nee rasik ba iha UNTL.
“Aleinde ida nee apoiu moral ba ami nia planu atividade sira karik ami sei halo no hasoru instituisaun estadu karik ami presiza Prezidente ninia apoiu moral para ami nia aktividade sira nee bele lao. Klaru, saida mak ami nia vizaun ami nia planu ami hatoo ba Prezidente ami presiza apoiu husi nai Prezidente nuudar aman ba nasaun para ami bele halao ami nia atividade,” katak nia.
Nia hatete, nia sai reitor lori nia planu ba dezenvolvimentu universidade nee rasik porkue nia lakoi temi hotu maibe iha programa 10 importante neebe lori ho ekipa tomak durante mandatu durante tinan lima lori hodi dezenvolve Universidade Nasional Timor Lorosae nee rasik.
Nia hatutan laos mai husu apoiu ba Prezidente Prezidente neeba la kaer osan osan iha no tinan-tinan governu tau osan maibe iha kanal apoiu husi neebe deit tantu Prezidente rasik hakarak apoiu finanseira ba estudante ou ba UNTL sira simu laos mai husu Prezidente iha kondisoes atu apoiu neebe laos husu osan ba Prezidente.
(eme)
