DILI, STLTIMORLESTE.com – Jesus konvida ema hotu nafatin hela metin iha ninia domin, no husik domin hodi haleu buat hotu hotu iha moris nee, no halo tuir ukun fuan.
Lia hirak nee hatoo husi Padre Paul Kerans, SVD ba STL liu husi nia refleksaun Kinta-Feira, Semana 5 Paskua, Kinta (7/5/2026), Joao 15:9-11 hatete, iha evanjelhu ohin Jesus husu ema hotu hela metin iha ninia domin.
“Iha Evanjelhu ohin nian, Jesus hatoo konvite ida atu hela metin iha Ninia domin, tema ida neebe klean no transformador. Pasajen ida nee laos deit konvite ida atu esperiensia domin, maibe atu hela iha ida-nee, hodi husik domin atu haleu aspetu hotu-hotu ita-nia moris nian. Jesus dehan, nuudar Aman hadomi Hau, nunee mos Hau hadomi imi, hela iha Hau nia domin,” dehan Padre Paul.
Padre dehan, domin ida nee hanesan Jesus esplika mak prezensa rohan-laek, reflete domin rohan-laek entre Aman no Oan. Hodi konvida ema hotu atu hela iha Ninia domin, Jesus oferese fatin ida refreskamentu no renovasaun konstante nian. Iha fatin neeba, ema hetan liberdade atu buras no hetan dame ida neebe metin iha domin divinu.
Hela metin iha Jesus nia domin signifika halo tuir Ninia ukun-fuan sira, neebe mak dalan ba ksolok klean liutan. Jesus dehan, “Se imi halo tuir Hau nia ukun-fuan sira, imi sei hela iha Hau nia domin.” Ukun-fuan sira nee integra domin iha ita-nia asaun loroloron nian, alina ita-nia fuan ho Ninian no transforma ita-nia interasaun sira ho ema seluk. Hodi tuir Ninia dalan, ita husik Ninia domin atu orienta ita, hodi kria moris sira neebe reflete ninia grasa no lia-loos,” dehan Padre.
Bibi Atan kreda katolika nee dehan hatete Jesus mos promete ba ema katak moris nee lori ksolok bainhira moris tuir saida mak Jesus hanorin iha ukun fuan Maromak nia.
“Jesus promete liutan katak dalan moris ida-nee lori ba ksolok neebe perfeitu “Hau hatete ida-nee ba imi atu hau nia ksolok bele hela iha imi no atu imi nia ksolok bele sai kompletu.” Ida-nee laos ksolok baibain, maibe Ninia ksolok, ksolok ida neebe klean, komprensivu, no dura. Ida-nee maka ksolok ida neebe ultrapasa dezafiu sira ita-nia moris nian no inserteza sira mundu nian,” dehan Padre Kerans.
Padre Kerans haktuir tan katak Jesus mak moris nia hun no rohan tanba neebe liafuan neebe nia hanorin sai rohan ba ema bainhira ema halo tuir.
“Bainhira ita reflete konaba pasajen ida nee, Jesus laos deit husu ita-nia obediensia maibe mos oferese relasaun ida iha-neebe ninia domin mak ita-nia forsa no ksolok nia hun. Atu ita-nia ksolok sai kompletu duni, no ita-nia moris sai testamentu ida ba kbiit transformador nian atu hela iha nia,” nia nakotu.
(eme)
