DILI, STLTIMORLESTE.com – Eis Deputadu Bankada Partidu Sosial Demokrata (PSD), Leandro Isaac, fo sai hanoin kritika kona-ba asuntu mata been neebe dala barak mosu iha publiku nia oin. Nia kestiona diferensa boot entre ema neebe uza tanis hanesan estratejia hodi buka simpatia, ho povu kiik neebe tanis tanba moris nia todan ka susar.
Tuir Leandro Isaac, mata been laos deit sinal tristeza, maibe bele mos sai hanesan instrumentu ida. Nia sublina katak iha mundu ohin loron, liu liu iha palku interese politika, ema balu hatene fabrikadu sira nia tanis hodi dada konfiansa ema seluk nian.
“Iha ema neebe tanis hodi hetan simpatia, maibe iha mos povu neebe tanis duni susar no mukit neebe sira hasoru iha moris loron loron,”dehan Leandro Isaac ba STL, Kinta (07/05/2026).
Hodi esplika kazu ema neebe finji tanis, Eis Deputadu iha primeiru lejislstura nee foti ezemplu natureza husi mata been lafahek nian (Air Mata Buaya). Neebe matenek nain sira deskobre katak, lafahek suli mata been laos tanba triste maibe tanba nia kabun bosu liu.
“Bainhira lafahek han too bosu, nia estomagu habit glandula mata been suli sai. Maibe bainhira nia hamlaha nia la tanis,” nia esplika hodi halo kom parasaun ho sira neebe tanis deit bainhira iha kargu ka interese ruma.
Isaac mos fahe klasifikasaun oioin kona-ba tanis neebe mosu iha sosiadade nia leet hanesan tanis natural (Tanba karakter ema nian fasil suli mata been), tanis ksolok (Mata been neebe suli tanba haksolok boot), tanis tanba moris (neebe mai husi terus no mukit neebe povu enfrenta) no tanis fabrikada (Tanis neebe kria ho klazulu hodi lohi ema seluk).
“Tanba nee hau konvida publiku atu matenek hodi distengue se mak tanis ho laran moos hodi sente povu nia terus, no se mak tanis deit hodi buka kadeira no poder,” hatete Eis Deputadu nee.
Enkuantu iha parte ketak Akademista UNTL, Silvino Soares nia haree katak, maski ukun nain sira hatudu emosaun tanis iha publiku, ida nee la fo solusaun direita ba povu nia moris.
“Ukun nain sira bele tanis tanba disputa poder ka kestaun politika, maibe povu tanis tanba dader deit labele han,” dehan Silvino.
(car)
