BAUKAU, STLTIMORLESTE.com – Governu liu husi Ministeriu Finansas (MF) realiza konsultasaun sidadania ba planu Orsamentu Jeral Estadu (OJE) 2027 iha Munisipiu Baukau.
Xefe ekipa atual Xefe Departementu Diresaun Jeral Planeamentu Orsamentu husi MF, José Fatima aprezenta, konsultasaun refere objetivu atu hakbesik ba komunidade hodi rona opinoes no preokupasaun real sira husi reprezentante partidu politikus sira, lideres igreja, jovem feto mane no entidades importante seluk neebe eziste iha Munisipiu antes elabora planu OJE tinan 2027 tuir lei enkuandramentu legal.
“Konsultasaun sidadania ida nee parte ida Governu hakbesik aan ba povu hodi rona povu nia lian atu identifika area prioridade nunee prepara ba periodu jornada Orsamental iha fulan Julhu,” José Fatima hateten iha Sentru Konvensaun Baukau Vila Antiga Baukau, Kinta (07/05/2026).
Nia sublina, atividade konsultasaun refere invole husi linha ministerial kompostu MF, Ministeriu Administrasaun Estatal (MAE), Ministériu Agrikultura, Pekuaria, Peskas no Floresta (MAPPF), Ministeriu Obras Publikas (MOP) no seluk tan tuir kada area servisu, nunee bele ajusta iha planu asaun anual 2027 ho diak iha jornada OJE molok ba Komisaun Revizaun Orsamentu (KRO).
“Ita espera orsamentu bele kobre iha area esensial atu dezenvolve ita nia munisipiu nee bele lao diak liu tan,” José komenta.
Iha fatin hanesan, Prezidente Autoridade Munisipiu Baukau, Veneranda Lemos konsidera, konsultasaun refere nia importansia atu halakon diverzensia sira hotu no ko’alia ba malu hodi intende programa inklui etapa orsamentu neebe ligadu ho situsaun real, tanba Baukau ba Baukau oan hotu.
“Espera katak halo diskusaun iha KRO relatoriu submete ona nunee kuandu membru KRO deside kortes ba programa infraestrutura presija konsulta antes tuir prioridade,” Veneranda hateten.
Enkuantu Sekretariu Ezekutivu Partidu FRETILIN Munisipiu Baukau, Gabriel Piedade Fraga mos konsidera, konsultasaun refere importante ba Munisipiu Baukau, tanba liu husi diskusaun sira mak junta opinioes, maibe prefere iha Baukau diak liu foku ba setor produtividade.
“Importante liu haree iha setor produtivu sira hanesan Agrikultura, Saude no Edukasaun, mais liu-liu agrikultura tanba baze ba ekonomia nasaun,” Gabriel katak
Entretantu Governu instituisionaliza ona konsulta publiku hanesan faze obrigatoriu iha siklu preparasaun Orsamental nian bazeia ba Lei Nu 03/2025 kona-ba Enkuadramentu Orsamental no Jestaun Finanseira Publika no operasionalizadu liu husi Dekretu-Lei Nu 42/2025, neebe fornese baze legal no enkuadramentu institusional ba konsultasaun durante preparasaun OJE.
Nunee mos objetivu espesifiku promove kultura Governasaun partisipatoria ida neebe transparente atu kaptura prioridade rejionol no setorial hanesan promove dialogu inkluzivu, haforsa halo politika ho informasaun dadus, nunee jere relatoriu neebe komprensivu apoiu diskusaun iha KRO no orienta alokasaun rekursu iha OJE 2027.
Atividade konsultasaun sidadania iha Baukau nee hetan partisipa husi Autoridade Munisipal kompostu Diretor Servisu Munisipal sira, Administrador Postu Administrativu 8, Xefi Suku 62 , Konselhu Munisipal Kombatente Libertasaun Nasional, Sosiedade Sivil inklui Partidu politiku neebe eziste iha Munisipiu Baukau.
(tom)
