BAUKAU, STLTIMORLESTE.com – Konselhu Munisipal Kombatentes Libertasaun Nasional (CMLCN-sigla português) Baukau submete ona dokumentus husi veteranus no martire nia ona neebe kompete ba programa bolsu estudu tinan 2026 husi Ministeriu Asuntu Kombatentes Libertasaun Nasional (MACLN – sigla português).
Sekretariu Jeral CMCLN Baukau, Roberto Carlos da Costa “Laran Tarido” aprezenta, bolsu estudu refere MACLN inisia husi dekretu lei numeru 8/2009 loron 15 Janeiru, iha neebe fo oportunidade ba veteranus no martire sira nia oan atu asesu bolsu estudu, iha neebe inisiu loron 23 Marsu 2026 too loron 21 Abril 2026, simu ona dokumentus husi veteranus no martire nian oan hamutuk 294.
“Dokumentus sira nee ita submete hotu ona ba Nasional, Ministeriu sei foku hela ba pagamentu, hau hanoin tarde liu too Outubro verifika ona lista sira para aprova ,” Sekretariu Jeral CMCLN Baukau, Roberto Carlos da Costa “Laran Tarido” hateten ba STL sira iha Vila Antiga Baukau, Sabado (09/05/2026).
Nia sublina, dokumentus hirak neebe submete ona ba nasional kompostu husi kandidatu estudante sira husi eskola ensinu baziku primeiru, segundu no terseiru siklu inklui kandidatu sira husi eskola ensinu sekundaria no ensinu superior.
Nia fundamenta, bolsa estudu refere nuudar politika ida husi Estadu Timor-Leste atribui ba veteranus oan no martire oan sira, tanba reflete ba istoria pasadu, neebe veteranus no martire sira fo ona sira nia tempu kontribui prosesu luta libertasaun nasional durante tinan naruk iha ai laran.
“Husu ba sira hotu atu aproveita didiak bolsa hakas aan estuda, bolsa nee hanesan bolsa motivasaun husi Ministeriu Asuntu Kombatentes Libertasaun Nasional atu motiva imi hodi estuda,” Laran Tarido rekomenda.
(tom)
