DILI, STLTIMORLESTE.com – Asidente fatal neebe akontese iha Sesta (08/05) maizumenus tuku 9:50 iha Kuluhun, Munisipiu Dili, rezulta Olandina do Rosário, idade 25, mate fatin. Kazu fatal nee Polisia Nasionál Timor Leste (PNTL) detein motorista durante oras 72 hafoin submete ba Ministèriu Públiku, hodi tuir prosesu primeira interogatóriu iha Tribunál.
“Asidente fatal neebe akontese iha Kuluhun , motorista ita detein oras 72, ninia prosesu lao, ita aprezenta ba Ministériu Públiku,” hatete Komisáriu Assistente, Orlando Gomes ba jornalista sira iha ESG Balide, Segunda (11/05/2026).
Iha sorin seluk, Xefe Seksaun Tránzitu Seguransa Rodaviaria Munisípiu Dili, Superintendente Asistente, Afonso da Silva esplika, hafoin akontese seksaun tránzitu investigasaun ba kedas lokál akontesimentu hodi asegura vítima ho isin mate ba Mortuariu HNGV, iha momentu neeba polisia mos asegura motorista ho kareta tanki mina husi Kompanhia ETO hodi submete ba identifikasaun, hafoin remata identifikasaun submete kedas auto notisia ba Ministèriu Públiku.
“Prosesu kazu nee depois akontesimentu, polisia too kedas iha fatin hodi rekolha evidensia, husi identifikasaun vítima nian momentu neeba familia sira lori identifikasaun mai iha seksaun tránzitu nian hodi submete ba prosesu investigasaun hafoin mak kanaliza ba Ministèriu Públiku tuir regra baibain,” nia koalia.
Nia esplika, haree tuir ninia kronolojia kuandu ema lakon vida, Primeiru foti ninia identifikasaun hafoin mak bele relata ba iha publiku. Liu-liu evidensia husi CCTV, nee hatudu katak iha akontesimentu nee, iha kareta tanki mina konsege atu ultra pasa no motorista neebe uza motorizada nee hetan asidente.
(jen)
