DILI, STLTIMORLESTE.com – Ema idak-idak presiza buka halo diak no hadomi malu, tanba moris iha mundu nee hanesan bainaka, la permanente, no moris rohan laek nee iha Maromak nia reinu.
Tuir Padre Paul Kerans, SVD ba STL tersa 12/05/2026 hatete, Reflesaun Ba Tersa-Feira, Semana VI Paska Nian, husi Joao 16:5-11.
Padre dehan, bainhira ema ida mate hakotu vida, iha mundu sempre halo nia familia fuan triste, maibe ema neebe hahalok diak maske isin laek maibe nia memori sira familia neebe moris kontinua konta nafatin.
“Saída sira sempre nakonu ho tristeza, porezemplu, ema neebe ita hadomi ka belun ida mate. Ka ema ida neebe besik ita- ia fuan neebe ita sei la haree ba tinan barak. Situasaun sira hanesan nee triste tebes no sempre nakonu ho tanis no laran susar. Maibe, ida nee separasaun fíziku deit, tanba memoria diak no furak sei hela no sei lembra ba nafatin,” katak Padre.
Padre dehan Iha Evanjellu ohin nian,Jesus neineik-neineik hadook-aan husi nia dixípulu sira (Agora hau ba ba ida neebe haruka hau mai, João 16:5). Separasaun nee fíziku deit tanba iha promesa katak Espíritu Santu la kleur sei hamutuk ho sira.
Bibi atan kreda katolika nee dehan “ida-nee maka faktu moris nian katak ita sei husik mundu ida-nee ba nafatin. Ita la hatene bainhira ida-nee sei akontese, maibe ita sei sai duni hosi mundu ida-nee. Ita hakarak atu kria uma rohan-laek ida iha ema sira neebe hatene no besik ita nia fuan? Tan nee, halo buat neebe diak nafatin no sai hanesan Jesus,” katak Padre.
Liu tiha ona tinan rihun rua desde Jesus eziste no presente iha rai ida nee, maibe Jesus nafatin iha ema nia fuan. Tanba sa? Tanba Nia sempre halo diak, Nia sempre inkarna simplisidade, haraik-an no diak iha Nia moris no serbisu. “Ita moris dala ida deit iha mundu nee, nunee mai ita moris hanesan Jesus moris,” hakotu.
(eme)
