AMBENO, STLTIMORLESTE.com – Sarani Parokia Nossa Senhora de Fatima Baoknana, tinan nee selebra loron aniversariu Parokia nee ba dala 25 nuudar festa bodas de prata, iha loron 13 de Maiu, tanba nee Konselhu Pastoral hamutuk ho Amu Parokia no Governu realiza seminariu loron ida hodi fo motivasaun ba ajente sira neebe serbisu tulun estadu atu hametin fiar.
Informasaun nee hatoo husi Diretor servisu Edukasaun, Vincencio Cono ba STL iha Oecusse, Segunda (11/05/2026) katak, Nossa Senhora de Fatima mosu iha Pastorinha sira nain tolu, Igreja Nosa Senhora de Fatima Baoknana opta ninia padroera, Nossa Senhora de Fatima Baoknana Sai Parokia, iha esperitu rua maka esperitu konstrutivu no esperitu destrutivu.
“Esperitu konstrutivu maka ita tenke hametin iha fiar, hodi haten dezenvolvimentu neebe ke diak iha naroman nomos atu fo nafatin motivasaun ba ajenti sira neebe serbisu tulun estadu, tanba igreja moris mak ita ema no igreja neebe permanente konsidera hanesan fatin sagradu ba sarani sira atu kada loron Domingu selebra misa iha igreja. Ohin hau fo palestra ba loron bodar de prata Ejistensia Igreja Nossa Senhora de Fatima Baoknana, atu motiva diak liu tan saida maka sai realidade liu husi esforsu tempu pasadu nuudar rekordasaun sira, prezente hanesan realidade no futuru nuudar eperansa foun ida atu parokia nee, bele moris diak iha futuru, nakloke ba publiku,” dehan Diretor Serbisu Edukasaun, Vincencio Cono.
Nia dehan, liu husi seminariu ida nee, atu fanu nafatin serbisu kolaborasaun, unidade iha serbisu spiritual neebe diak, atu nunee hametin nafatin fiar sarani katolika ninian, tanba nee Amo Parokia Nossa Senhora de Fatima Baoknana, atu selebra tinan 25, konsidera hanesan bodas de Prata, ba Parokia nee iha Postu Administrativu Nitibe, Baoknana, Rejiaun Administrativa Espesial Oecusse-Ambeno.
“Hau hanoin, tempu too ona, Nitibe oan iha Parokia Nossa Senhora de Fatima Baoknana, maske amo parokia sira sempre troka malu, maibe ho ho sira nia esperitu troka malu nee, hanorin ita atu hatene klean liu kona ba karakteristika kada dirijentes hanesan reprezentante Padre Parokia too ohin loron. Festa bodas de prata, sadik ita para bele motivasaun barak liu atu bele serbisu hamutuk ho igreja, serbisu hamutuk, harii unidade, atu hasoru naroman neebe furak liu tan iha future,” dehan nia.
Iha oportunidade hanesan, Jestor Postu Administrativu Nitibe, Agustinho Afulit dehan, nuudar Autoridade Postu Administrativu Nitibe hatoo saudasoens ba loron padroeira Parokia Nossa Senhora de Fatima Baoknana ninian neebe sei selebra iha loron 13 de Maiu tinan nee, ba dala 25.
“Ami husi parte Autoridade Postu Administrativu Nitibe, sempre kolabora ho parte igreja ninian, atu selebra loron importante nee, liga ho sprituridade nuudar sarani katolika, sempre fo apoiu, ho atividades fiziku nomos non fiziku, hamutuk ho sarani no povu Suku 5 iha Nitibe mak, Suku Beneufe, Suni Ufe, Usi Taku, Lelaufe no Ban Afi, sentru maka Parokia Baoknana,” dehan Jestor Nitibe, Agustinho Afulit.
Nia haktuir tan katak, liu husi seminariu loron ida neebe realiza iha Parokia Baoknana, kona ba ejistensia 25 parokia nee, nuudar sarani no Autoridade Nitibe agradese no sente orgulhu tebes, tanba kada tinan sarani ho sira nia kbiit rasik kolabora ho governu no Igreja sempre selebra loron importante ida nee.
(jos)
