DILI, STLTIMORLESTE.com – Prezidente Republika (PR), Jose Ramos Horta sei tulun oan kiak nain 5 neebe lakon inan aman tutuir malu iha Balibo.
Família ida iha Aldeia Caco, Suku Sanerin, Postu Administrativu Balibo Munisípiu Bobonaro, enfrenta hela situasaun triste, hafoin inan no aman mate tuir-tuir malu iha fulan ida nia laran, husik hela oan kiak nain lima (5), inklui bebe ida neebe foin kompleta nia idade ba fulan haat.
Novidade nee hatoo liu husi oan feto boot, Rosalina da Purificação, iha nia karta neebe nia lee diriji ba Prezidente Ramos-Horta liu husi video ho durasaun minutu ida. Nia husu apoiu umanitariu no fo tulun ba asesu sira nia estudu iha futuru.
“Ami oan kiak nain-5 hatoo ami nia komprimenta boatarde ba Avo nai Prezidente. Atu husu tulun ba Prezidente ho Avo nia laran luak ajuda ami nain-5. Ami nia inan Mate foin semana 3 liu ba no ami nia aman foin lalais mak mate. Ami husu atu Prezidente bele tau matan mai ami nia eskola, hahan no hatais,” dehan Rosalina.
Simu tiha informasaun nee, Prezidente orienta kedas nia ekipa Unidade Sosiedade Sivíl no Asuntu Sosial Prezidensia Republika, hodi halo vizita urjenti ba família refere.
Assesor Prezidensia Repúblika Quintiliano Moniz iha vizita iha Balibo, Tersa (12/05/2026) hateten, sira nia parte sei koopera ho autoridade munisipal no Ministeriu Edukasaun atu garante ba oan sira nia asesu ba edukasaun no apoiu sosiál.
“Husi Prezidensia kompromete atu kontinua tau matan liu-liu ba bebe neebe sei iha fulan haat no sei fo asistensia kondisaun saude ba família nee”. Hateten Quintiliano.
Tuir kronolojia neebe hatoo husi família no komunidade vizinu katak, sira nia inan Matebian Aliança Maia, antes nee moras dadaun ona hafoin matebian fo partu ba nia oan feto ikun, liu husi prosesu operasaun iha Hospital. Kondisaun nee grave liu tan bainhira too fulan-4 deit, família refere simu realidade katak sira nia inan hakotu-iis (mate) no husik hela oan nain-4 ho bebe ida neebe sei kiik-oan foin halo ba fulan 4.
Liu tiha semana rua, ninia la’men, Anselmo da Purificação, mos hakotu nia Iis (mate) tanba ho presaun emosional psikolojia.
Dadaun nee, oan kiak nain-5 hela hamutuk ho sira nia avo feto no inan-bin boot neebe agora assume responsabilidade atu tau matan hela ba sira.
Xefe Suku Sanerin, Francisco R. Tavares, agradese ba Prezidente Ramos-Horta tanba bele responde lalais ba situasaun família refere, hodi haruka kedas ekipa husi Gabinete Prezidénsia atu ba fo apoiu direta.
Iha vizita refere, ekipa Prezidensia Republika mos entrega apoiu nesesidade bazika hanesan fos, mina, roupa no osan balun neebe mai husi Prezidente nia bolsu rasik, hodi ajuda hakmaan ba família refere iha tempu emerjensia nee.
(eme)
