MALUK lee nain sira iha rai laran no rai liur!. Rubrika figura edisaun ohin, hakerek nain hakarak fo konhese figura ida neebe riku ho matenek no iha tinan barak nia laran fahe ona ninia matenek ba Timoroan sira iha fatin neebe nia servisu ba. La seluk la leet nia mak Drs. Manuel Florencio da Canossa Vong, BA., Dip.TAA., MSi., PhD.
Manuel Vong moris iha Samoro, Soibada, Manatuto, Timor-Leste, iha loron 7 fulan Novembro 1961 husi Aman Miguel Vong (Agrikultor) no Inan Maria de Fatima Amaral (Dona da Casa) ho Maun Bin Alin nain 10 kompostu husi, Jose das Dores Vong, Francisco Vong, Maria Jose Vong, Aurelia de Fatima Vong, Eugenio Vong, Manuel Vong, Maria Pia Vong, Prisca Vong, Rosa Vong.
Manuel Vong forma uma kain ho Dr. Eng. Anastasia Sri Endang Purwatiningsih, MSi., no iha oan nain rua mak Emanuel Vong, B.Bus.(Hons), M.Par, ho Noe Vong, B.Eng.(Hons).
Manuel Vong hahú nia edukasaun iha Colegio São Nuno Alvares Pereira Soibada, husi nível Pré-Primária (ABC), Primária (Primeira Klasse, Kartilha, Segunda Klasse, Treseira Klase, Kuarta Klasse) 1967-1973.
Depois nee, nia kontinua estudu iha Eskola Teknika Preparatoria Portugues 1974-1975, SD Negeri 8 Díli, 1977, SMP Negeri 1 Díli 1978-1980, no SMAK Santo Yoseph Díli 1981-1984 (Passa ho Primeiru Klasifikadu – Rangking 1 iha SMAK).
Iha nível edukasaun superior, nia kompleta Diploma III iha área Kepemimpinan Pemerintahan iha APDN Banjarbaru, Kalimantan Selatan, Indonésia 1984-1988 (Primeiru Klasifikadu – Ranking 1 APDN). Nia kontinua hetan grau Licensiatura (S1) iha Ilmu Politik no Komunikasi Politik iha Institut Ilmu Pemerintahan (IIP) Jakarta 1988-1991 (Passa Klasifikasaun 10 Melhores husi 27 Provinsias – 10 Terbaik husi 27 Provisias), Indonésia.
Depois nee, nia kompleta Mestradu (S2) iha área Public Policy, Master Administrasi Publik iha Universitas Gadjah Mada (UGM), Yogyakarta, Indonésia 2000- 2002 (Passa ho Klassifikasaaun Sangat Memuaskan).
Iha área dezenvolvimentu kapasidade internasionál, Dr. Manuel Vong mos realiza Intership Study iha Griffith University, Austrália iha 2004. Nia hetan mos Certificate IV Training and Assessment (TAA) no Diploma Training and Assessment (TAA) husi Victoria University, Austrália iha 2008.
Iha nível akademiku aas liu, nia kompleta Doutoramentu (S3) Philosophy of Doctor (PhD) iha área Tourism, ho espesializasaun iha Sustainable Tourism Development of Timor- Leste as a Small Island and Emerging Tourism Destination, iha Faculty of Economy, University of Algarve, Portugal (Passa ho Cumlaude) iha 2014.
Peskiza doutoramentu nee fó kontribuisaun importante ba dezenvolvimentu turizmu sustentável no polítika turizmu iha Timor-Leste hanesan nasaun kiik insular no destinasaun turizmu neebé dadaun dezenvolve an. Antes Timor-Leste ukun-an rasik, Dr. Manuel Vong iha esperiénsia servisu neebé luan no diversu iha área ekonomia, administrasaun públika no lideransa governativa.
Nia hahú nia vida profisionál hanesan agrikultór no empreendedór kiik, involve iha atividade sosa no faan paun no servisu hanesan taxista no condutór profisionál. Esperiénsia hirak nee forma nia espírito servisu, disciplina no kapasidade empreendedora desde jovem.
Depois nee, nia tama hanesan Funcionáriu Públiku Nasional (PNS) iha Kementrian Dalam Negeri, Jakarta, Indonésia, no servisu iha administrasaun governu iha Timor Timur. Nia okupa pozisaun hanesan Staff Administrasaun iha Bagian Kepegawaian Setwilda Tk. I Timor-Timur, no depois assume responsabilidade lideransa hanesan Kepala Sub-Bagian Pendidikan & Agama no Kepala Bagian Pendidikan, Sosial dan Agama.
Iha nível governasaun lokal, Dr. Vong nomeadu hanesan Camat Barique, iha Distritu Manatuto, hodi lidera administrasaun no dezenvolvimentu lokal iha área rural. Nia mos servi hanesan Assisten Sekwilda Tk. II Manatuto no Pelaksana Sekwilda, ho responsabilidade iha koordinasaun administrasaun governu local no servisu públiku iha distritu refere.
Tanba nia kapasidade lideransa no esperiénsia administrativu, nia mos sai hanesan Calon Bupati Manatuto antes referendu independénsia Timor-Leste. Esperiénsia servisu durante períodu nee kontribui boot ba formasaun nia visão lideransa, governasaun no servisu ba komunidade, neebé depois sai base importante ba nia kontribuisaun iha Timor-Leste independente.
Depois Timor-Leste ukun-an rasik, Dr. Manuel Vong kontinua fó kontribuisaun boot ba dezenvolvimentu Nasaun Timor-Leste liuhosi edukasaun ensino superior, governasaun, turizmu no dezenvolvimentu rekursu umanu. Nia hahú servisu akademiku iha Dili Institute of Technology (DIT) iha Junho 2002 too ohin loron nee 2026 hanesan Staff Dosen no depois assume responsabilidade importante iha jestaun no lideransa instituisaun nian.
Hetan rekonhesimentu hanesan Staff Senior DIT tuir Estatutu DIT 2016 no hatama henesan Membro Permanente Board of Trustess DIT hamutuk ho Dr. Salustiano dos Reis Piedade nunee completa Membro Fundadores DIT nain 9 nebee harii DIT iha 10 Maiu 2002.
Iha DIT, nia servi hanesan Manager Administrasaun no Finansas, Xefe Departamentu Public Management, Pró-Reitor Assuntu Akademiku, Peskizadór CARPS-DIT no Auditor Internal. Nia mos sai Membro Permanente Board of Trustees DIT no depois eleito no nomeadu hanesan Reitor Dili Institute of Technology 2015-2019 maibe nia lidera DIT too deit 2017 tamba nomeado ba Menistro Turismo iha VII Governo Konstitusional RDTL. Durante nia lideransa, foku liuba haforsa Institusional no konsegue halo Master Plan Kampus Central DIT no Regista Fundasaun DIT iha Notariado Menisterio Justisa RDTL iha 2016. Iha periode nee, DIT dezenvolve sai hanesan universidade privadu ida neebé forte iha Timor-Leste, ho reputasaun akademika diak no relasaun internasionál neebé luan no organiza International Conference on Emerging Tourism Destination iha 2016 no hamusu Rekomendasaun strategico ba desenvolvimento Turismo Timor-Leste hanesan: Politika Nasional Turismo 2017, Autoridade Nasional Turismo 2023, Plano Estrategico Nacional Desenvolvimento Turismo 2023.
Iha área governasaun nasional, Dr. Vong nomeadu hanesan Ministru Turizmu RDTL, ho responsabilidade hodi lidera polítika no estratéjia dezenvolvimentu turizmu nasional. Nia mos servi hanesan Tourism Expert Advisor ba VIII Governo Constitucional no Vogal Comissão Plano Recuperação Económica Timor-Leste. Nia mos lidera Timor-Leste nia
partisipasaun iha Expo Dubai 2020 hanesan Koordenadór Jeral Nasional nebee sucesso maski iha situasaun Covid maibe bele simu visitante iha Pavilaun Timor-Leste hamutuk 340 740 visitantes liu tiha estimasaun atu simu deit 250 000 visitantes.
Iha área edukasaun superior no pós-graduasaun, nia lidera estabelesimentu Programa Graduate School no MBA DIT iha 2018, no atualmente serve hanesan Diretór Programa Doutoramentu (DBA/PhD) DIT iha 2025. Nia mos hanesan Professór Permanente ba programa Bachelor 2002 – 2026, MBA 2018 – 2026 no DBA DIT 2025-2026, no Professór Konvidadu iha universidade nasional no internasionál hanesan iha UGM Indonesia, UNDANA Kupang Indonesia, UCSI University Malaysia, no SEARA (South East Research Academy) Singapore – Malaysia.
Iha setor turizmu no sosiedade sivíl, Dr. Vong hamutuk Nai Ulun Religiao Katolika, Protestante, Islam, Kong Fu Tcu, Hindu funda Associação Turismo Religioso Timor-Leste iha 2019 no servi hanesan Diretór Executivo hodi promove turizmu espiritual no patrimóniu kulturál iha Timor-Leste. Nunee mos hamutuk ho Nain ba Agencia Viagem no Operador Turistico sira harii Associasaun Operador Turismo Timor-Leste iha 2020.
Iha área empreendedorismu no dezenvolvimentu kapasidade juventude, nia hamutuk ho Sr. Joanico Jeronimo funda Incanto International Institute no lidera instituisaun nee hanesan Deputy CEO / Diretór VET (Vocational Education and Training), ho objetivu atu prepara juventude Timoroan iha área lingua Inglesa, lideransa, turismo, hospitalidade no preparasaun merkadu internasionál.
Iha área akademika no ensinu, Dr. Vong hanorin no orienta estudante sira iha área Turizmu Sustentável, Polítika Públika, Governasaun, Lideransa, Empreendedorismu, Human Resource Management, Jestaun Estratéjiku, Critical Thinking no Administrasaun. Nia servisu akademiku iha Dili Institute of Technology hahú desde tinan 2002 no kontribui boot ba dezenvolvimentu edukasaun superior iha Timor-Leste.
Dr. Vong mos partisipa iha formasaun profisionál no vokasionál internasionál. Nia hetan Certificate no Diploma iha Training and Assessment husi Victoria niversity, Australia, no mos forma iha Leadership Development and Pedagogic Excellence (IGNITE) husi AKEPT Malaysia iha tinan 2025 iha DIT. Nia mos partisipa iha treinamentu kona-ba Social Survey Design and Analysis no Financial Management.
Iha área peskiza no publikasaun sientífika, nia iha interese boot iha Turizmu Sustentável, Governasaun Turizmu, Polítika Públika, Dezenvolvimentu Rekursu Umanu, Polítika Edukasaun no Dezenvolvimentu Rejionál. Nia hakerek no publika artigu no capitulo livru importante sira hanesan: Agritourism, Regenerative Tourism and other emerging tourism types: Philippines, Singapore, and Timor-Leste (2026), Uma Estratégia Para Um Turismo Sustentável Em Timor-Leste (2023), Turismo nos Paises da Língua Portuguesa (2023), Tourism In Timor-Leste: Contributions to a Sustainable Development (2014), Turismo em Timor-Leste: Presente e Futuro (2014), Residents Attitudes Towards Sustainable Tourism Development in Timor-Leste (2013).
Nia mos lidera no partisipa iha peskiza nasional no internasionál ho organizasaun importante sira hanesan World Bank, UNICEF, USAID, International Republican Institute no Governu Timor-Leste. Projetu importante sira inklui: Plano Estratégico Nacional Timor-Leste 2010–2030; Timor-Leste Labor Market Survey; Political Polling Timor-Leste; Peskiza kona-ba juventude no HIV/SIDA; no estudu kona-ba dezenvolvimentu turizmu sustentável no atitude komunidade iha Timor-Leste.
Iha área kompeténsia profisionál, Dr. Vong iha kapasidade forte iha lideransa estratéjika, governasaun instituisionál, analize polítika, diplomasia no negosiasaun. Iha área téknika, nia domina area conceptual design, strategic management, research design no supervisaun akademika.
Nia bele koalia ho diak iha lian Tetum, Português, Inglês no Bahasa Indonésia. Dr. Vong konhesidu hanesan lider ida neebé iha simplisidade, integridade, transparénsia, responsabilidade, ética profisionál, kapasidade servisu hamutuk no kompromisu forte ba dezenvolvimentu ekonomia, empreendedorismo, edukasaun, juventude no nasaun Timor-Leste. Ho esperiénsia neebé luan iha área akademika, governasaun, peskiza no lideransa, Dr. Vong sai hanesan ema ida husi lider Timoroan neebé kontribui boot ba dezenvolvimentu edukasaun superior, turizmu sustentável, polítika públika no diplomasia edukasionál iha Timor-Leste, rejiaun ASEAN nebee halao ligasaun colaborasaun DIT ho UCSI University Malaysia hodi estabelese DBA Programa – One Doctor, One Industry, One Project, DIT – UCSI University International Collaboration no ligasaun colaborasaun DIT ho Kenneth&Co hodi loke Bachelor Top-Up Program no MBA Top-Up Program nuudar parte ida husi vizaun DIT 2050 ba Internationalizasaun DIT iha Regiaun ASEAN no Global. Mikael Mali Mau
Drs. Manuel Florencio da Canossa Vong, BA., Dip.TAA., MSi., PhD.
Fatin no Data Moris : Samoro, Soibada, Manatuto, iha loron 7 fulan Novembro 1961
Inan no Aman : Maria de Fatima Amaral no Miguel Vong
Feen kaben : Dr. Eng. Anastasia Sri Endang Purwatiningsih, Msi
Oan : Rua (2)
