DILI, STLTIMORLESTE.com – Feto barak oras nee asume kargu oin oin tanba sira iha duni kapasidade neebe diak, laos tanba lei mak garante deit no laos kasian maibe tanba sira nia kapasidade.
Tuir Feto Potensial Maria Amaral ba STL iha nia knaar fatin Kaikoli, Kuarta (13/05/2026) hatete, uluk feto nia involvimentu iha politika nomos foti desizaun menus tebes, maibe ohin loron iha mudansa tanba feto sira hatudu ona liu husi nia kapasidade neebe sira hetan.
“Los duni katak lei garante duni feto atu partisipa iha atividade hotu no ohin loron feto barak hola parte iha Ministra, Visi Ministra, Diretora no seluk tan ida nee feto hatudu nia kapasidade duni, no sira assume kargu tanba sira iha kapasidade lidera laos tanba lei mak autoriza hodi fo ou laos tanba kasian maibe ida nee sira nia kapasidade duni,” katak nia.
Nia mos husu feto foinsae sira nafatin kapasita aan hodi kompete ho mane sira iha kualker atividade tanba lei rasik mos fo garantia ba feto atu hola parte iha atividade hotu, no bainhira partisipa ou hola parte presiza duni matenek tanba nee presiza kapasita aan hahu husi agora.
Nia haktuir tan katak feto nia involvimentu iha politiko sai ona lisaun ba foinsae sira, katak feto bele hola parte iha parte hotu.
Involvimentu feto aumenta feto presiza hotu hotu presiza kapasita aan hahu husi familia too publiku, katak iha familia feto presiza hatudu nia vontade hodi hatudu ba familia katak feto bele asesu eskola, no feto mos bele foti desizaun, no iha politiko feto labele nonok maibe tenke aplika matenek neebe iha.
Nunee mos Akademista Judite Dias Ximenes hatutan tan katak timor Leste iha Sistema Patrilineal no Matrilineal uluk inan aman uza liu patrilineal hodi fo oportunidade ba oan mane mak bele asesu ba eskola no bele partisipa iha atividade publiku sira maibe ohin loron iha mudansa tanba lei rasik garantia feto mos iha direitu.
“Ohin loron feto barak mak asesu ona eskola liu liu iha nivel universitariu, no feto barak mos oras nee iha kapasidade neebe diak hodi hola parte iha nivel importante sira iha nasional nomos suku sira ida nee hatudu mudansa boot tebes,” katak nia.
Tuir nia katak oras nee dadaun feto barak mak sai ministra, Deputada, nomos seluk tan hodi foti desizaun ba destinu nasaun nia.
iha artigu 16 no 17 konstituisaun Republika Demokratika Timor Leste RDTL mos fo dalan ba feto sira katak feto ho mane iha direitu no obrigasaun neebe hanesan atu partisipa iha politika no mos foti desizaun.
(eme)
