BAUKAU, STLTIMORLESTE.com – Sidadaun inisial EX, idade 62, husi Suku Gariuai, Postu Administrativu Baukau Vila, Munisipiu Baukau, deskonfia pozitivu ba moras rabies atual baixa iha Hospital Rejional Eduardo Ximenes (HoREX) Baukau.
Diretor Klinika HoREX Baukau, Francisco Mouzinho da Costa Belo aprezenta, sidadaun refere asu tata iha loron 08 Marsu tinan nee, nunee iha loron refere hetan ona tratamentu iha HoREX Baukau, iha neebe mediku sira fo aimoruk antibiotiku no fase asu nia tata fatin iha sidadaun nee nia ain parte karuk, iha neebe momentu neeba kuaze kondisaun diak ona, maibe iha loron 07 Maiu nee, sidadaun refere iha sintoma ba moras rabies.
“Nia sintoma hanesan rabies haree bee tauk ida nee mak amu suspeita ba rabies nia sampel parte vizilanjia nian lori ona ba Dili ita hein rezultadu,” Diretor Klinika HoREX Baukau, Francisco Mouzinho da Costa Belo hateten ba jornalista sira iha nia knaar fatin HoREX Baukau, Kuarta (13/05/2026).
Nia haktuir , momentu asu tata sidadaun refere iha loron 07 Marsu 2026, iha neebe sidadaun refere halao duni tratamentu iha HoREX, maibe parte mediku sira la fo vasina rabies nian ba sidadaun nee, tanba laiha stock vasina ba rabies nian.
Nia rekonhese, momentu neebe sidadaun refere asu tata parte HoREX la halo teste ba rabies nian, maibe antes fo alta ba sidadaun nee husi sala baixa HoREX, mediku sira sujere ba sidadaun nee atu hakbesik aan ba Sentru Saude nunee bele hetan vasina ba rabies nian, maibe dala ruma la hetan vasina rabies iha Sentru Saude.
Nia komenta, mezmu nunee maibe daudaun pasiente kondisaun jeral diak no kontinua hetan tratamentu husi mediku sira iha sala baixa HoREX Baukau hein rezultadu ezaminasaun husi laboratoium nasional.
“Rezultadu nee loron tolu loron haat ida karik, pasiente nee kondisaun jeral diak hela agora daudaun tratamentu iha Hospital hela,” Mouzinho akresenta.
Mediku nee husu sidadaun hotu bainhira asu tata habesik aan lalais ba fasilidade saude hodi hetan vasina rabies, tanba moras rabies bele prevene, maibe bainhira afeta ona pozitivu ba moras rabies labele kura.
Tanba nee husu ekipa task force iha Munisipiu Baukau neebe foku ba prevensaun moras rabies tenke atu lalais rabies neebe deskonfia alastra ona iha Baukau.
“Ekipa harii tiha ona mais servisu seidauk maksimu, entaun servisu makaas para kombate buat sira nee,” Mouzinho komenta.
Tuir informasaun neebe STL asesa asu pozitivu rabies iha Baukau hamutuk 14, maibe veterinaria no Servisu Saude Munisipal Baukau neebe involve iha ekipa task force nee la fo komentariu, razaun akumula hotu dadus hafoin publika ba publiku.
(tom)
