AMBENO, STLTIMORLESTE.com – Prezidente Autoridade Rejiaun Administrativa Espesial Oecusse-Ambeno (PA-RAEOA), Regio da Cruz Salu apresia ho aprezentasaun husi TradeInvest Timor Leste neebe aprezenta Emprezariu Oecusse oan ida husi Postu Administrativu Pasabe neebe iha interese investe ai-haan lokal hanesan fehuk, talas, aifarina, batar, foos lokal, batar kay rala, marungi prosesa sai foos, ida nee investimentu segundu Oecusse oan, tanba investimentu dahuluk husi Julio Mak neebe investe iha setor transporte Maritima ro Succes Irmao Timor neebe dadaun normaliza ona asesu transporte husi tasi.
“Ohin Hau hateten katak, uniku, primeiraves iha Oecusse, setor privadu ida husi Oecusse, husi Pasabe, maun alin ida nee durante nee nunka haree hetan husi ninia matan, maibe nia ema primeiraves sei hetan sertifikadu de investimentu no nia sei kontinua hetan fasilitasaun husi governu kona ba nia nesesidade atu importa husi estranjeiru mai TL hanesan halo investimentu iha area infraestrutura, investimentu primaria neebe nia uza nia sei goja taxa livre ba importasaun, taxa livre kona ba rendimentu no rezultadu neebe nia produs,” dehan PA-RAEOA, Regio da Cruz Salu ba STL iha Oecusse, Kuarta (13/05/2026).
Nia dehan, iha enkontru ho TradeInvest TL, nuudar Prezidente Autoridade RAEOA ohin husu ba TradeInvest Timor Leste ho Camara Comersiu Industria Timor Leste (C-CCI-TL Nasional no Rejional Oecusse, atu tradeInvest mai kontinua esplika ba sosiedade ekonomiku iha Oecusse nuudar autores ekonomia hanesan CCI-TL ho non emprezariu sira husi aspeitu kooperativas, atu mai haree, tanba durante nee ema estranjeiru mai lori orsamentu ho ninia ekipamentu oi-oin husi rai liur neeba mai TL inklui lori mos sira nia esperensia, maibe presiza promove Oecusse oan, ou setor privadu sira neebe maka hakarak sai investidor,” akrezenta PA-RAEOA.
“Ita nia irmao nee, hau seidauk temi ninia naran iha nee, maibe nia sai ezemplu ba Oecusse oan otas jerasaun foun, sai ezemplu ba emprezariu sira seluk atu banati tuir tanba osan laos problema, maibe institusionaliza, haforsa, hametin instituisaun kapasidade negosiu maka importante, nunee ita lao tuir koridor no halo tuir, saida maka governu hateten ita katak, governu mos iha dever atu promove no fasilita. Tanba nee hau fo aplaus no hau enkoraza setor privadu Oecusse oan sira atu banati nosaun ou mainset neebe hatudu dadaun husi ita nia maun alin Oecusse oan ida nee,” afirma nia.
Iha enkontru Silverio Freitas nuudar Manajer Setor Industria no promosaun investimentu tradeInvest Timor Leste ho PA-RAEOA akompanha husi Sekretariu Rejional nain 3 no Diretor Rejional nain 21, aprezenta kompanhia Lokal Oecusse oan Sufnentimo Nafael Unipesoal, Lda neebe iha inisiativa atu halo investimentu transforma produtu lokal hanesan aifarina, fehuk, talas, foos lokal, batar, batar kayrala no marungi sai produtu foos kualidade no nutritive ho marka Maun Boot.
Tanba nee disponibilidade rai neebe empreza lokal nee presiza 3 hektares, husu atu fornese bee no eletrisidade ba planta industria.
Iha biban nee, Sekretariu Rejional asuntu Sosial no organizasaun urbana, Merita Marques Lafu apresia ho inisiativa Oecusse oan neebe iha inisiativa diak hakarak investe produtu lokal sai foos ho nutritivu, tanba nee ba oin sei tulun ona komunidade sira neebe kuda aihan sira nee, atu hasae rendimentu familia.
(jos)
