DILI, STLTIMORLESTE.com – Udan boot neebe tau foin lalais nee rezulta estrada ligasaun ba area Tuleduk, Postu Administrativa Fohorem, Munisipiu Covalima nakfilak ba tahu dodok. Situasaun nee halo movimentu transporte publiku no komunidade nian paraliza loos no labele funsiona ho diak.
Liu husi ligasaun telefone Komunidade Fohorem, Martinho da Silva hatete, kondisaun estrada neebe nakonu ho tahu klean no luan tebes nee, labele ona sirkula husi kualker meus transporte, tantu karreta lori sasan ka motor neebe tenke dudu deit ho kbiit tomak. Nia mos haktuir tan katak, sidadaun sira neebe hakarak sosa nesesidade bazika ka lori produtu lokal ba merkadu, agora dadaun tenke lao ain deit hodi hakat liu tahu ho dezafiu boot.
“Ami labele sirkula ona. Karreta ho motor labele liu tanba tahu klean no aas sae too motor nia roda kotuk. Se situasaun nee husik naruk, ami bele afetadu ba aihan no mos labarik sira labele ba eskola,”dehan Martinho ba STL, liu husi Telefone, Kinta (28/05/206).
Kondisaun nee tuir Martinho fo ameasa ba kazu emerjensia, liu liu inan isin rua no mos moras todan sira neebe presiza lori urjente ba Sentru Saude Fohorem ka Ospital Referal Suai.”Ami husu ba Governu lokal no Ministeriu Obras Publika atu labele nonok no foti asaun urjenre hodi haruka makina ba hamos tahu, no tula fatuk hodi kria fali parajen provizoriu ba povu,”dehan nia.
Haree ba dezafiu nee Observador Ekonomia, Aniceto de Oliveira preokupa konaba impaktu husi estrada aat nee ba dezenvolvimentu ekonomiku iha area rural. Tuir nia infraestrutura neebe naksobu hanesan nee fo kedas impaktu boot no hamate ligasaun ekonomika iha baze.
“Bainhira estrada aat ka kotu, rezultadu agrikultura iha Fohorem labele tula sae ba merkadu iha Suai ka Dili.Ida nee lori lakon boot ba osan laki agrikultor sira nian tanba produtu sira bele dodok deit iha fatin.Iha parte seluk folin nesesidade baziku neebe tula tula tama ba Fohorem sei sae aas, tanba kustu transporte nian neebe sae makas tanba dezafiu estrada tahu nian nee,” hatete Aniceto.
Nia afirma, se Governu la foti asaun lalais, situasaun nee sei hamenus kbiit sosa komunidade nian, no bele aumenta tan kbiit kiak iha fali area foho sira.
Entretantu dezafiu konaba estrada neebe nakfilak ba tahu dodok nee laos deit akontese iha Fohorem, maibe sai mosu kestaun neebe mosu iha Postu Administrativu no Munisipiu sira seluk iha territoriu laran tomak, liu liu iha area foho sira tanba impaktu husi udan been neebe foin dadaun nee tun la para ka naruk.
Iha parte seluk dezafiu infraestrutura nee sai mos topik prinsipal iha media sosial hanesan Facebook no TikTok. Kuaze loron loron sidadaun sira sirkula no fahe (Share) foto hanutuk ho vidio oioin neebe hatudu tebes kondisaun estrada sira neebe nskonu ho tahu dodok, kareta soke rabat rai no motor neebe tenke dudu deit hodi nunee bele dada atensaun no husu preokupasaun seriu husi Governu sentral.
Nunee mos too notisias nee STL hatun, parte Autoridade lokal no nasional sira seidauk fo resposta ruma, konaba planu intervensaun estrada neebe sai fali hanesan natar tahu nian nee.
(car)
