DILI, STLTIMORLESTE.com – Fransa komprometidu atu hametin kooperasaun ho Timor-Leste, liuliu iha área kapasitasaun rekursu umanu, formasaun no seguransa defeza.
Ministru Defeza, Kontra-Almirante Donaciano do Rosário da Costa Gomes “Pedro Klamar Fuik” informa katak, Fransa hakarak amplia kooperasaun bilaterál ho Timor-Leste.
“Fransa hakarak hametin kooperasaun ho Timor-Leste, liuliu iha área seguransa no defeza, atu apoia kapasidade nasaun nian,”hatete Ministru Defeza (MD) Kontra-Almirante Donaciano do Rosário da Costa Gomes “Pedro Klamar Fuik” ba jornalista sira iha Ministeriu Defeza Fatuhada, Dili, Sesta-feira (06/11/2026).
Nia hato’o deklarasaun ne’e ba jornalista sira hafoin simu vizita kortesia husi Embaixadór Fransa ba Indonézia, Timor-Leste no ASEAN, Fabian Penone.
Ministru Defeza esplika katak kooperasaun ne’e sei inklui área formasaun, ezersísiu konjuntu, vizita navál no kapasitasaun rekursu umanu.
“Fransa hakarak estabelese kooperasaun iha área formasaun, ezersísiu, vizita navál no kapasitasaun rekursu umanu”, nia informa.
Nia afirma katak, kooperasaun bilaterál tenke bazeia ba benefísiu mútuu, ne’ebé Timor-Leste no Fransa bele kontribui ba malu.
“Kooperasaun ne’e la’ós ita simu de’it, maibé ita mós tenke fó kontribuisaun ba malu”, Ministru Defeza subliña.
Iha enkontru ne’e, sira mós ko’alia kona-ba situasaun jeoestratégika no seguransa globál, inklui konflitu iha Europa, Médiu Orienti no Ázia.
Ministru Defeza konsidera katak diferensa no dezakordu entre nasaun sira presiza rezolve liuhusi diálogu, atu evita konflitu ne’ebé bele afeta populasaun.
“Timor-Leste adere ba pás, estabilidade no dezenvolvimentu. Tanba ne’e, diálogu importante atu evita konflitu”, nia akresenta.
Nia afirma katak, Timor-Leste iha polítika relasaun internasionál ne’ebé bazeia ba kooperasaun, la haree nasaun ida hanesan inimigu ka fó preferénsia ba nasaun espesífika.
“Timor-Leste laiha inimigu no laiha amigu espesiál. Nasaun hotu hanesan, depende ba termu kooperasaun ne’ebé ita bele halo hamutuk”, nia subliña.
Iha fatin hanesan, Embaixadór Fransa ba Indonézia, Timor-Leste no ASEAN, Fabian Penone, hateten katak nia vizita objetivu atu diskute oportunidade sira hodi hametin kooperasaun ho Timor-Leste.
Diplomata ne’e mós agradese ba Ministru Defeza Pedro Klamar Fuik, tanba simu nia ho di’ak no fó oportunidade atu diskute asuntu importante sira iha enkontru kortezia ne’e.
(jen)
