QUELICAI, STLTIMORLESTE.com – Organizasaun Naun Governamental, Fundasaun Sentru Feto Haburas Dezenvimentu (F-CFHD) apoiu material soru tais ba Grupu Soru Tais Bualale iha Suku Bualale, Postu Administrativu Quelicai, Munisipiu Baucau, atu kontinua produz no promove tais Timor nuudar patrimoniu kultural Timor Leste nian.
Reprezentante Diretora F-CFHD atual Responsavel Programa Finansas, Albertina Barbosa aprezenta, iha tinan 2026 F-CFHD hetan alokasaun fundus husi Governu liu husi Gabinete Apoiu Sosiedade Sivil hamutuk US$ 15 mil hodi F-CFHD apoiu ba grupu sira neebe eziste iha Munisipiu Baucau pertense ba F-CFHD inklui grupu soru tais Bualale.
Nia sublina, grupu soru tais Bualale nundar grupu foun no area produsaun foku ba tais Timor, tanbanee F-CFHD aloka ba material soru tais hanesan kaba’as ho folin US$ 250 ba grupu refere, atu produz tais no promove iha rai liur no rai laran liu liu iha Postu Quelicai Suku Bualale, tanba Suku Bualale, potensial boot ba prezervasaun kultural no identidade Timor-Leste.
“Ami hili Suku Bualale tanba iha potensial boot ba preservasaun kultura no identidade Timor-Leste. Ami hakarak promove sira nia tais ba rai laran no rai liur atu bele fo benefisiu ekonomiku ba membru grupu sira no sira nia familia,” hateten Albertina Barbosa ba STL hafoin serimonia entrega material iha Bualale, Sabadu (30/05/2026).
Nia sublina, apoiu material refere nuudar faze dahuluk, maibe bainhira grupu refere hatudu vontade no kapasidade atu produz tais ho rezultadu diak, parte F-CFHD sei kontinua fasilita promosaun no divulgasaun tais sira ba Governu no ba vizitante estranjeiru sira neebe mai Timor-Leste, atu bele hatene no valoriza tais Timor orijinal.
Nia fundamenta, liu husi promosaun sira nee sei loke oportunidade merkadu ba produsor sira, tanba Governu no turista sira bele sosa tais neebe produz husi grupu refere, neebe sei kontribui no hasae rendimentu ekonomia komunidade iha baze.
Nunee rekomenda ba grupu atu kontinua produz tais orijinal husi Postu Administrativu Quelicai, liu-liu tais tradisional Suku Bualale nian, atu patrimoniu hanesan tais tradisional Bualale nian bele preserva no transmite ba jerasaun foun sira.
“Kona-ba ameasa tais nian, hau fiar katak liu husi formasaun no organizasaun grupu soru tais hanesan ida nee, identidade no valor tais Timor sei la lakon iha ita nia nasaun,” Albertina Barbosa argumenta.
Iha fatin hanesan Xefe Suku Bualale, Gabriela Belo da Conceição konsidera, inisiativa Governu liu husi organizasaun naun governamental apoiu grupu soru tais iha Suku Bualale sai nuudar politika ida neebe importante atu prezerva no promove tais Timor nian. Iha neebe programa hanesan nee laos deit proteje patrimoniu kultural, maibe mos fo oportunidade ekonomia ba familia sira, liu liu inan ho kondisaun espesial sira neebe durante nee menus asesu ba merkadu.
“Ida nee fo benefisiu boot ba ami nia komunidade, liu-liu ba inan feto sira no ema ho difisiensia neebe envolve iha atividade nee, atu bele sustenta familia iha uma laran. Tanba balun husi sira ho difisiensia iha ain, neebe difisil atu lao dook ba merkadu, maibe liu husi soru tais ida nee sira bele servisu iha area besik no transfere produtu ba loja sira atu faan,” hateten Gabriela Belo da Conceição.
Enkuantu Xefe Grupu Soru Tais Bualale, Celestina Gusmão da Costa sente kontente ho apoiu refere, tanba hetan apoiu husi organizasaun naun governamentais F-CFHD, maibe apoiu refere seidauk sufisiente.
“Ami sente kaba’as mak la barak, entaun ami soru nee tais mane feto ida rua hanesan nee deit, neebe ami soru mak selendang oan sira neebe ami prezisa barak ida idak nia bantal, tanba sira apoiu nee laos bantal, apoiu nee rahun,” Celestina Gusmão da Costa informa.
Tuir xefe grupu nee katak, apoiu neebe grupu refere simu husi F-CFHD hanesan kaba’as bainhira produz ba tais bele hetan deit tais feto ida no tais mane ida, tanba apoiu refere limitadu, nunee husu apoiu kaba’as ho volume barak hodi grupu bele produz barak faan iha merkadu.
Entretantu grupu soru tais Bualale rejistu membru feto hamutuk nain 10, iha neebe serimonia entrega material soru tais nee testemunha husi Xefe Suku Bualale no reprezentante Konselhu Suku Bualale.
(tom)
