BAUCAU, STLTIMORLESTE.com – Eskola Ensinu Baziku Filial (EBF) 1 Siklu e 2 Siklu Belavista enfrenta difikuldade asesu bee mos, tanba fornesimentu bee la estabil, obriga eskola sosa bee.
Preokupasaun ne’e hato’o husi Koordenadora EBF Belavista, Cesarina de Jesus Gusmão ba STL, Kinta (06/11/2026).
Nia dehan, kada tinan eskola uza osan husi orsamentu konsesaun eskolar atu sosa bee, maibé tinan ida-ne’e eskola hetan difikuldade tanba bee ne’ebé programa PNDS lori tama iha suku la to’o ho regularidade.
Nia esplika katak, maski eskola selu ona osan ba bee, maibé iha períodu balun bee la mai, nune’e obriga eskola uza fali osan husi konsesaun eskolar atu sosa bee.
“Foin dadauk ami uza fali osan husi konsesaun eskolar atu sosa bee ba fulan Setembru no Novembru. Ami hein de’it bainhira bee mai, tanba situasaun ne’e bele afeta estudante sira, nune’e ami hakarak evita sira la hetan bee,” nia dehan.
Nia informa katak, husi fulan Janeiru to’o Julho, fornecimentu bee lao ho di’ak, maibé hahú husi fulan Agostu to’o agora bee la mai ho regularidade.
Tanba situasaun ne’e, eskola tenke bolu kareta-tanki atu lori bee ho folin US$12 kada viajen, hodi asegura estudante sira bele uza bee ba nesesidade loroloron, inklui fase no uza sentina, no mós tein hahán ba merenda eskolar.
Nia hatutan katak, eskola selu ona osan ba Xefe Aldeia no responsavel PNDS kona-ba fornecimentu bee, no informa ona mós ba sira kona-ba problema ne’e.
Nia haktuir katak, fornecimentu bee ba komunidade iha jerál di’ak, maibé ba eskola mak kontinua hasoru difikuldade.
Koordenadora ne’e mós informa katak, EBF Belavista iha total estudante nain 315, ne’ebé hamutuk ho profesor sira presiza bee atu uza loroloron.
Eskola uza bee bidon lima kada loron, tanba estudante no profesor sira presiza bee ba nesesidade iha eskola. Ho konsumu ne’e, bee bele hotu iha semana rua, nune’e iha fulan ida eskola presiza sosa bee dala rua.
Tanba ne’e, nia husu atu Xefe Suku no entidade responsavel sira fó atensaun ba problema fornecimentu bee ba eskola, atu estudante sira bele kontinua aprende iha ambiente ne’ebé seguru no iha bee sufisiente.
(joa)
