DILI, STLTIMORLESTE.com – Ohin Uma Kreda selebra Solenidade Santissima Trindade, misteriu boot ita nia fiar nian, Aman, Oan no Espiritu Santu laos atu halo definisaun, maibe kontempla Maromak nia fuan mak domin.
Lia fuan murak nee hatoo husi Arsebispu Arquedioseze Metropolitana Dili, Dom Virgilio Cardeal do Carmo da Silva, SDB liu husi nia omilia, wainhira prezide misa iha Igreja Se Katedral Dili, Domingu (31/5/2026).
“Iha Solenidade Santissima Trindade nian, Santa Kreda konvida atu hanoin klean liu tan kona-ba ministeriu boot ita nia fiar nian, Aman, Oan no Espiritu Santu iha laos atu koalia kona-ba defenisaun ka konseitu, maibe haree liu kona-ba relasionamentu ida Aman, Oan no Espirtu Santu, Santissima Trindade revela mai ita katak Maromak nia fuan mak domin, ida neebe ita bele fahe no simu, hanesan ohin ita rona iha livru Ezodu nian aprezenta mai ita Moises neebe Maromak iha foho, Maromak hatudu ninia aan, Maromak revela nia aan nuudar ida neebe mizerikordiozu, la hirus, laran luak, fiel nafatin ba ita, iha momentu hakarak hatudu mai ita katak Maromak nee la dook maibe besik kompaisaun, buat furak neebe aprende nia besik mai ita,” hatete Dom Virgilio.
Iha omilia Dom Virgilio hatete, iha salmo neebe ohin hananu konvida sarani sira atu hahi Maromak fo gloria ba Nia, konvite ida ba kriatura hotu atu rekonhese diak hotu neebe Maromak haraik ona fo onhra nia, iha Domingu nee ema idak-idak mai, tanba ita rekonhese moris, saude, familia no diak neebe ema simu, ita agradese tanba Maromak tau matan, Maromak bali ema idak-idak iha moris.
Iha Sao Paulo termina ninian karta hodi hahi Santissima Trindade nia naran grasa Nai Jesus Kristus nian, Maromak nia domin no halibur hamutuk iha Espiritu Santu atu dehan ba sarani sira katak Trindade Santissima nee laos buat ida neebe aas ita labele kompriende, ita labele esplika, maibe iha esperiensia loron-loron nian iha moris liu husi grasa Maromak nia domin nunee mos kominaun, basa Maromak hadomi tebes mundu fo nia oan mane mesak revela Santissima Trindade ninian fuan domin neebe fo salva no konvida ita atu ba moris rohan laek.
Dom Virgilio hatete, iha semana kotuk selebra Pentekostes lo-loos nee festa Pentekostes hotu ona, Domingu ohin tama ba bain-bain maibe liturjia propoin festa rua, ida Santissima Trindade selebra daudaun ohin, rua Corpo de Deus neebe sei selebra iha loron Kinta feira mai, tuir toman bain-bain iha Igreja Timor selebra festa corpo depois festa Santissima Trindade neebe marka ho prospesaun husi Bamode ba Lecidere.
“Momentu nebee atu refelete tema sentral ita nia fiar, ita fiar iha Maromak neebe los, balun dehan importante fiar iha Maromak ida, maibe diak ba ita atu hatene fiar iha Maromak ida oinsa nee, entre sarani sira mos idak-idak iha imajen Maromak ida ninian, maibe dala ruma ita labele hatudu Maromak nia oin lo-loos Jesus nia futar oin los iha ema idak-idak nia moris, dala ruma ita imajen hanesan karik eskiriva no farizeu sira nian karik, tanba sira iha imajen ida kona ba Maromak ida legislador, Maromak ida tesi lia nain, Maromak ida fo kastigu ba ida neebe halo diak simu prezente ida neebe lao sala kastigu,” hatete Dom Virgilio.
Tanba nee presiza hanoin oituan kona-ba imajen Maromak nian neebe dezde kiik mai tau iha ita neon no fuan moos, tanba Maromak neebe tau iha ita ulun mak dala barak influensia ema nia hahalok sira, influensia moris tomak, se tau ita ulun dehan Maromak fiar mak tesi lia nain, domin dor, iha liu poder, dala barak ita mos iha tendensia ida nee atu gosta tesi lia ba ema seluk, gosta atu hanehan ema seluk, gosta esplora ema seluk.
Se ita tau neon Maromak neebe hatene servi, iha moris buka hatene atu lao tuir moris tuir hahalok ida nee, tan nee importante ba ita atu fiar iha Maromak ida neebe no Maromak oinsa nee.
Nicodemus ema matenek boot ida iha kalan buka Jesus, tan hakarak rona husi Jesus atu kompriende liu tan misteriu hirak nee, Jesus dehan Maromak hadomi tebes mundu hodi haruka nia oan mai iha mundu, tanba hadomi.
Domin Maromak ninian nee domin neebe la buka nia aan, domin la buka interese, domin ida neebe nia haksolok wainhira haree ema haksolok, nia kontente wainhira nia haree ema moris diak, tanba domin ida laos hanoin kona-ba ninia aan, halo diak ba ema neebe halo aat ba ita, ida nee mak karakteristika Jesus nia wainhira iha tempu terus nian, iha Pilatus nia oinsa nia sasin hasoru ema hirak halo aat ba nia.
Tanba iha Maromak laiha buat seluk, maibe iha buat ida deit mak domin, ida nee Maromak sarani ida ninian maske ita ema halo aat too oho nian, maibe nia hadomi ita nafatin, ho Maromak ida mak bele harii mundu foun ida, laos ho odiu laran moras malu.
(joa)
