DILI, STLTIMORLESTE.com – Instituto Ciência Saude (ICS) simu ona subvensaun 50% husi Ministeriu Ensinu Superior Siensia no Kultura (MESSK), no daudaun nee hahu ezekuta, sei tau prioridade ba asuntu haat.
Afirma Reitor ICS, Leao Borges ba STL iha nia knaar fatin Balide, Kuarta nee (17/06/2026).
“Ami simu tiha ona subvensaun nee 50%, agora daudaun ninia ezekusaun nee lao hela, bainhira ninia ezekusaun nee remata mak sei submete relatóriu, depois mak sei simu tan faze segundu nian ba 50%, subvensaun nee ami foin simu iha fulan Maiu nia laran, nee duni daudaun nee ICS foin mak ezekuta hela subvensaun ida nee,” nia komenta.
Nia dehan, subvensaun ida nee sei tau priodade ba iha asuntu haat mak hanesan apoiu estudantes, dosentes, nomos sei tau prioridade ba iha asuntu sira seluk tan, bainhira halo relatóriu mak sei husu tan 50% nee.
“Ita nafatin agradese ba parte governu liu husi MESSK neebe mak fo apoiu subvensaun ba ita nian ensinu superior sira, hodi bele uza tuir ida-idak nia prioridade neebe mak ita iha, nunee ezekuta hotu, ami sei halo fali relatóriu para hatama ba iha MESSK,” nia dehan.
Reitor ICS akresenta, ICS simu uluk subvensaun 50%, ida nee mak daudaun nee ezekuta hela, hotu mak halo relatóriu para simu tan 50%, tanba laos simu dala ida maibe simu dala rua.
(jac)
