DILI, STLTIMORLESTE.com – Oras nee daudaun programa merenda eskolar iha eskola sira munisípiu tolu mak sei paradu, maibe garante semana oin bele lao normal hanesan baibain.
Lia hirak nee hatoo husi Xefe Departamentu Programa Merenda Eskolar iha ME, Belchior Maria Almeida Barros ba STL iha nia knaar fatin Kinta nee (18/06/2026).
“Hau hanoin iha eskola publika iha Dili, uniku EBC Akadiruhun ho nia filial sira mak merenda lao hela, restu nee ita bele dehan paradu osan ba Q 2 seidauk tama ho EBC Metinaro mos ho nia filial sira mak merenda eskolar lao. Dili, Covalima ho Viqueque, maibe sira hotu garante katak tarde liu segunda semana oin programa nee lao normal ona,” nia deklara.
Nia dehan, programa merenda eskolar iha munisipiu seluk lao normal hanesan baibain, no munisípiu tolu neebe mak ohin mensiona nee mak too agora seidauk lao. Kona-ba EBF 12 de Outubro Tasi-Tolu seidauk simu orsamentu ba Q2 ninian, tamba relatoriu Q1 nian tama tarde, eskola balun relatoriu tama sedu, maibe sira nia TPO mos seidauk sai.
Iha fatin seluk, Diretor EBC Manleuana, Carlos Correia hatete, programa merenda eskolar iha sira nian eskola seidauk lao, tanba osan ida Q2 nee seidauk sai, oinsa mak estudantes sira atu asesu ba iha programa merenda eskolar.
“Agora daudaun ami nian estudantes sira seidauk asesu ba iha programa merenda eskolar, la hatene bainhira mak programa nee lao hanesan baibain, nee depende husi ita nian ministériu, maske hau haruka GAT ba cek ona osan merenda eskolar nian, maibe dehan osan seidauk sai ida, agora haruka ba cek fali tan,” nia hatutan.
Carlos dehan, maske TPO sai tiha ona, maibe osan seidauk tama iha konta bankaria eskola nian, nee duni husi parte eskola nian hein deit bainhira mak osan nee sai para estudantes sira bele asesu hikas ba iha programa merenda eskolar.
“Bainhira osan nee sai mak ita bele implementa fali merenda eskolar, tanba nee durante loron hira nian laran, merenda eskolar la lao no estudantes sira mai iha eskola la asesu ba iha programa refere,” nia haktuir.
(jac)
