Dili, STLTIMORLESTE.com – Tribunal Judisial Primeira Instansia Dili (TJPID) halao julgamentu ba krime Omisidiu Tentada no Arma Branka neebe mak komete husi arguidu inisial OdJM hasoru lezadu inisial DSX iha Munisipiu Aileu.
Iha indisus katak, iha loron 19 fulan Novembru tinan 2025, 12h00 OTL, iha area aldeia Niciulun, Suku Carahili, Postu administrativo Remexio, Munisipiu Aileu. Momentu neeba, ofendidu lori nia avo fila husi Sentru Saude Remexio, tanba lori nia avo ba konsulta.
Arguidu OdJM bolu husi kotuk katak “hoiii, hoiii, hein lai”, rona nunee ofendidu hein. Kuandu arguidu too husu bee ba ofendidu dehan fo bee oituan nia hemu. Ofendidu dehan bee nee avo nian, arguidu dehan eiiixaa, fo oituan hau hemu lai caralho.
Ofendidu fo bee ba arguidu hemu hotu, nia dehan “o, hakarak hau sona tiha o ka?
Arguidu losu tudik husi nia kanotak hodi sona kedas ofendidu nia hirus matan parte karuk besik kalilin nia. Arguidu losu atu sona tan mak ofendidu halai, sasin Jaime haree hodi lori ba tratamentu.
Arguidu OdJM halo nia hahalok nee livre, delibereda, proposito, intensaun, hatene momos katak lori tudik sona iha ema nia hirus matan bele halo kanek no pior liu bele mate, no hatene mos katak tudik nuudar instrumentu hodi utiliza iha servisu domestika nian, mezmu nunee nia ignora hodi altera no halo tuir saida mak hakarak.
Arguidu OdJM mos hatene katak, halo hanesan nee krime no sei hetan kastigu tuir lei.
Ho hahalok nee, konstitui arguidu OdJM nuudar autor material ho forma konsumadu ba Krime rua (2)/konkursu husi Homisidio ho forma tentada, no outro arma branca, neebe previsto no punido iha artigu 23° 24° 138° 35° n° 1 husi Kodigu Penal.
Hatan ba akuzasaun nee, arguidu konfesa ba Tribunal katak, iha momentu nee arguidu lori tudik sona ofendidu, tanba ofendidu fila husi Ospital mak arguidu husu bee ba iha ofendidu, maibe ofendidu la fo tanba nee arguidu sona ofendidu ho tudik. No tudik neebe sona ofendidu mak tudik neebe arguidu lor loron lori tui-tuir no sikat iha faru, tanba arguidu faa modo no kua modo.
Arguidu esplika, antes problema nee arguidu konsumu ai-moruk, tanba arguidu husi kiik too agora kondisaun moras Psikolojia, nunee durante nee arguidu halo tratamentu iha Ospital Psikiatria Laklubar.
Aleinde nee, ofendidu deklara, momentu neeba ofendidu akompanha nia avo ba Ospital mak derepente arguidu kaer kanuru boot hodi duni ofendidu.
Ofendidu esplika, arguidu ho lezadu la eskola hamutuk no la konhese malu, maibe inan aman sira konhese malu.
Ofendidu dehan, durante ofendidu baixa iha Ospital, arguidu nia inan aman mak ba vizita ofendidu no sosa ai-moruk sira nee, arguidu nia inan aman mak responsabiliza. No ofendidu rona katak, durante arguidu sei kiik, arguidu moras Psikolojia.
Rona tiha deklarasaun sira nee, Tribunal deside hodi tama ba alegasaun Ministeriu Publiku no parte Defeza nia.
Maibe Ministeriu Publiku rekere ba Tribunal atu tama ba alegasaun tenke rona mos Mediku Espesialista Pisikatria nia, atu bele hetan relatoriu Mediku nia ba arguidu nia kondisaun.
No parte Defeza la iha pozisaun ba rekerimentu Ministeriu Publiku nia.
Nunee Tribunal deside muda ba loron seluk hodi kontinua ba alegasaun Ministeriu Publiku no parte Defeza nia, tanba relatoriu Mediku nee nesesariu tebes, tanba durante arguidu Prizaun Preventiva arguidu konsumu ai-moruk.
Iha audensia Julgamentu nee prezide husi Juiza koletiva, Ana Paula Fonseca, Ercilia de Jesus, José Maria, Ministeriu Publiku reprezenta husi Prokurador, Bartolomeo de Araújo, arguidu reprezenta husi Defensor Publiku Manuel Amaral.
(ter)
