DILI, STLTIMORLESTE.com – Menu programa merenda eskolar bazeia ba Gabinete Apoiu Tekniku (GAT) hamutuk ho fornesedor sira nian planu, hodi tein merenda ba estudantes sira no menu nee kada loron tenke troka, atu nunee estudantes sira vontade atu han.
Haktuir Koordenador EBF Fatumeta, Jose Manuel Guterres ba STL iha nia knaar fatin, Tersa nee (23/06/2026).
“Programa merenda eskolar seidauk lao, tanba ami nian servisu ligasaun ho servisu GAT nian, tanba sira seidauk hatama sira nian relatóriu ba Ministériu Edukasaun, entaun osan nee seidauk tun, tanba too agora ami nian relatóriu nee seidauk hatama, nee duni kuaze semana ida ona ami nian estudantes husi eskola ida nee la asesu ba iha programa merenda eskolar ninia, nee duni osan tuir mai nee seidauk,” nia dehan.
Nia dehan, agora daudaun GAT sira tuir hela treibamentu, tuir informasaun katak osan tama ona iha konta bankaria eskola nian, maibe depois mak haruka GAT cek hodi ba foti osan programa merenda eskolar ninia nee iha banku, atu nunee bele foti osan ida nee, estudantes sira bele asesu ba programa refere.
“Ita nian dadus ano letivu foun nee atus sia rua nolu resin ualu mak asesu ba iha programa merenda eskolar ida nee, maibe bazeia ba han nee, menu nee sira fornesedor mak planu, servisu hamutuk ho GAT, menu nee tanba bazeia ba planu GAT ho fornesedor sira nian planu, atu nunee menu nee bele troka hela deit, labele ida nee hela deit, maibe presiza troka menu nee para estudantes sira iha vontade atu han,” nia haktuir.
Nia dehan, ema nain lima mak tein ba estudantes sira han, tanba ema neebe mak tein nee mos depende ba hirak neebe iha ona konhesimentu atu tein, tanba tein nee dader too loraik, kona-ba estudantes sira han nee depende ba sira nian aula, tanba sira iha turnu tolu, primeiru turnu nee tama tuku 7:30, tuku 10:00 sai sira tenke simu kedas merenda, turnu segundu nian forma tama kedas aula, rua sai simu merenda, nunee turnu datolu nee tama fali, depois tuku 3:30 sira simu kedas hahan, tama fali aula sai tuku 5:00.
“Neebe laiha labarik ida atu halimar kleur, ita nian fornesedor sira uza gas no ai, ita nian estudantes sira mos konsumu aifuan nee mak hanesan hudi, aidila, apel nomos pateka, aifuan sira nee estudantes sira han troka malu, laos han oin ida deit lae,” nia afirma.
Nia informa, ayam potong, sosis no ikan nee la tama iha menu, ita nian estudantes sira konsumu deit naan fresku no ikan fresku deit, tanba nee ita labele uza fali ikan kulkas, ayam potong no sosis nee, nee duni sira la uza ida nee.
Iha fatin hanesan, Deolindo Maia Nunes hanesan estudantes hatete, semana ida ona sira la asesu ba merenda eskolar, espera iha semana ida nee nia laran programa ida nee bele lao diak, para estudantes sira bele asesu ba programa refere.
(jac)
