BAUCAU, STLTIMORLESTE.com – Durante implementasaun programa merenda eskolar iha faze Q1, Servisu Munisipal Edukasaun Baucau nota modo neebe oferese ba estudante sira liu liu naan balu iis ona no manu tolun aat nian.
Diretor Servisu Munisipal Edukasaun Baucau, Afonso dos Santos da Costa aprezenta, implementasaun programa merenda eskolar iha anu letivu 2026 neebe Munisipiu Baucau faze dahuluk (Q1) hahu iha loron 20 Janeiru liu ba, fornesementu modo sira ba estudante benefisiariu sira iha programa refere liu liu modo sira balu la hijene, tanba hanesan modo naan karaun iis no manu tolu aat nian. Kondisaun nee nota iha eskola katolika Domingos Sávio Vila Antiga no eskola publiku EBF Caisido Tirilolo Baucau Vila.
“Iha Q1 nee mak husi eskola no inspetor sira aprezenta liu liu ba modo sira, hanesan iha SDK naan iis iha Caisido manu tolun mak aat, ida nee mak uluk sira kestiona,” hateten Afonso dos Santos da Costa ba STL iha Vila Nova Baucau, Tersa (23/06/2026).
Nia komenta, razaun naan sira sai iis no manu tolu sai aat iha dapur programa merenda eskolar, tanba sei falta fasilidade sira atu asegura modo sira hanesan naan no manu tolun neebe fornese husi fornesedor sira, maibe modo naan no manu tolun sira neebe aat la fornese ba estudante sira.
Husi akontesimentu refere, Afonso katak, sai referensia ba Servisu Munisipal Edukasaun Baucau koordena ona ekipa fornesedor sira inklui grupu jestaun komunitariu sira iha terrenu halo jestaun didiak ba programa refere hodi fo hahan hijene ba estudante benefisiariu sira iha programa refere.
“Ita husu ba sira antes fornese ba labarik sira tenke haree bainhira aat ona tenke troka fila fali, ida nee mak ita fo hatene ba ita nia ekipa sira nee para kuidadu sasan sira nee,” Afonso rekomenda.
Iha sorin seluk, Koordenadora Agrupamentu EBC terseiru siklu Santo António Teulale neebe responsabiliza ba programa merenda eskolar iha eskola Domingos Sávio Vila Antiga, Elezita Maria Cabral rekoinhese, iha implementasaun programa merenda eskolar faze dahuluk (Q1) fulan Fevereiru tinan 2026, estudante sira iha eskola Domingos Sávio Vila Antiga han modo naan karaun iis no ular.
“Memang loos, maibe antes nee naan lori mai diak tein tiha ona lori ba fornese ba estudante sira mak akontese naan iis no ular, mais ida nee ba tiha ona neeba mak iis neebe ita mos ladun hatene,” Elezita katak.
Koordenadora agrupamentu nee hakfodak ho kondisaun nee, tanba eskola katolika Domingos Sávio Vila Antiga fahe ba turnu rua, dader no loraik, maibe kondisaun naan iis no ular nee akontese deit iha parte estudante benefisiariu turnu dader nian, enkuantu estudante benefisiariu turnu loraik neebe ho fornesementu modo tein deit iha sala ida nee, la sente no la haree kondisaoens modo naan karau iis no ular.
“Entaun momentu sira inspesaun no diretor edukasaun mai ami rezolve kedas iha nee, sira fornesedor troka kedas naan nee iha dia seguinte,” Elezita komenta.
Nia argumenta, daudaun nee grupu implementador programa refere antisipa, bainhira nota no haree modo la diak sempre koordena ho fornesedor troka.
Enkuantu, estudante primeiru anu iha eskola katolika Domingos Sávio, Michaela la sente kondisaoens modo naan karau iis no ular iha momentu neeba no kontente ho implementasaun programa merenda eskolar iha eskola refere.
“Agora ami han iha ami nia eskola nee diak loro-loron ami han modo naan karau no modo manu tolu la iis no ular laiha,” estudante nee espresa.
Entretantu implementasaun programa merenda eskolar iha Munisipiu Baukau ho valor orsamentu US$ 2,788,690 fo benefisiu ba estudante rihun 34.614 husi eskola sira kompostu Pre-Eskolar, Ensinu Baziku Primeiru, Segundu no Terseiru Siklu sira, no ninia implementasaun mantein ho regras tinan 2025 nian.
(tom)
