BAUCAU, STLTIMORLESTE.com – Relasiona informasaun neebe espalha iha media sosial katak, ema dskonhesidu tenta naok labarik, Servisu Munisipal Edukasaun Baucau husu inan aman akompanha oan sira ba eskola.
Diretor Servisu Munisipal Edukasaun Baucau, Afonso dos Santos da Costa aprezenta, mezmu too ohin loron Servisu Munisipal Edukasaun Baucau seidauk simu informasaun ruma husi parte eskola no estudante sira nia inan aman inklui entidades relevantes seluk, kona-ba ema dekonhesidu naok labarik iha area Bugaiti Baucau Vila no informasaun seluk neebe Servisu hetan mak, situasaun hanesan mos akontese iha eskola pre-eskolar Caritas Vila Nova Baucau.
“Boatus sira nee husu inan aman sira akompanha ita nia oan pre-eskolar, primeiru segundu anu sira nee, diak liu ita familia akompanha,” Afonso hateten ba STL iha Vila Nova Baucau, Tersa (23/06/2026).
Nia esplika, akompanha oan sira ba eskola atu antisipa oan labele hetan asidente no seluk tan, tanba liu liu labarik estudante pre-eskolar, primeiru anu no segundu anu kauze idade kiik ba eskola dook husi uma.
Nia sublina, kestaun nee Servisu Munisipal Edukasaun Baucau sei koordena ho Komando Polisia Munisipiu Baucau hodi haree situasaun refere, tanba nee prejudika ba labarik estudante sira nia prosesu aprendizajem, tanba tauk sei la ba eskola.
“Nee foin iha media deit, neebe ami sei buka tempu ba komfirma eskola sira nee para hatene, nee tebes ga lae,” Afonso katak.
Nia husu inan aman akompanha sira laos iha momentu boatus ema naok labarik, maibe akompanha sira hatene sira nia partisipasaun iha prosesu aprendizajem iha eskola.
Iha sorin seluk, profesora responsabiliza ba Pre-Eskolar Caritas Vila Nova Baucau, Dulce Terezinha Sarmento katak, rejeita informasaun labarik estudante lakon naok husi ema deskonhesidu iha eskola refere.
“Informasaun ema naok labarik nee la akontese iha ami nia eskola, mais ami rona fila fali husi bairo seluk no husi media ami haree, nunee ami fahe informasaun ba inan aman akompanha oan sira mai eskola,” Dulce informa.
Profesora nee komenta, durante informasaun espalha iha media sosial kona-ba labarik estudante lakon iha area Bugaiti Baucau, parte eskola aviza kedas ba inan aman sira akompanha oan sira ba eskola. Maibe inan aman sira neebe servisu laiha tempu akompanha oan sira iha eskola, parte eskola responsabilidade tomak bainhira eskola sai nafatin akompanha labarik estudante sira iha eskola no bainhira inan aman fila husi servisu hafoin entrega oan ba inan aman lori ba uma.
Entretantu total edifisiu pre-eskolar neebe eziste iha Munisipiu Baucau hamutuk 50 resin.
(tom)
