DILI, STLTIMORLESTE.com – Populasaun Timor Leste hatudu sira nia respeitu ikus ba Eis Prezidente Republika atual Prezidente Partidu FRETILIN, Saudozu Francisco Guterres Lu Olo ho sentimentu neebe klean. Bainhira karru funebre lori kadaver (mate isin) husi Aeroportu Internasional Nicolau Lobato ba rezidensia iha Farol, sidadaun sira neebe hamriik iha dalan ninin simu ho matan-been.
Situasaun iha dalan pibliku hatudu sidadaun sira neebe hein ho kalma iha estrada ninin hodi fo omenajen ba Saudozu Francisco Guterres Lu Olo neebe kontribui ona ba luta libertasaun nasional. Populasaun kontinua hein iha dalan ninin hodi hein pasajen husi karru fúnebre nian.
Triste nee laos deit husi militante Partidu FRETILIN nian, maibe husi sidadaun hotu neebe rekonhese figura ida neebe iha ligasaun istorika ho prosesu indepensensia rai nee. Seguransa iha dalan neebe karru liu ba kontroladu ho rigorozu husi Polisia Nasional Timor Leste (PNTL) hodi asegura pasajen nee lao ho hakmatek.
Membru Governu, Parlamentu Nasional, Lider Politika, Amu, Madre no figura husi sosiedade sivil mos partisipa iha pasajen mate isin nee. Sira hamutuk ho povu hatudu katak grande eroi Saudozu Francisco Guterres Lu Olo nuudar simbolu unidade ba Timorroan hotu.
Iha dalan neebe karru fúnebre liu ba, povu mos hatudu sira nia dedikasaun liu husi tau aifunan ba karru funebre nia leten. Atitudee ida nee hatudu katak povu rekonhese valor neebe saudozu husik hela ba nasaun.
Bainhira too iha rezidensia Farol, família, kolega Politiku no povu neebe hein iha neeba simu ho tanis. Rezidensia nee sai fatin ba omenajen ikus neebe povu fo ba sira nia Eis Xefe Estadu.
Husi estrada ninin Mario Soares sidadaun ida neebe hein pasajen nee ho mataben hatoo nia sentimentu triste.” Ami lakon tan lider boot ida neebe sempre hanoin povu kiik. Hau senti triste tebes tanba nia dedikasaun ba nasaun nee hela nafatin iha ami laran. Nia luta ho aten brani sei sai nafatin ezemplu ba jerasaun sira iha futuru,” dehan Mário ba STL, Tersa nee (23/06/2026).
Nia dehan, lider sira neebe fo an tomak ba povu nia diak, sira nia naran sei moris nafatin iha istoria nasaun nian.
(car)
