DILI, STLTIMORLESTE.com – Programa merenda eskolar iha eskola sira munisípiu 13 lao normal hanesan bai bain, no hela deit Munisípiu Covalima semana oin foin hahu lao.
Haktuir Belchior Maria Almeida Barros hanesan Xefe Departamentu Programa Merenda Eskolar iha ME ba STL iha nia knaar fatin, Kuarta nee (24/06/2026) katak, iha semana hirak liu ba munisipiu tolu mak merenda eskolar la lao, maibe daudaun nee munisípiu rua seluk lao ona no Munisipiu Covalima semana oin mak foin hahu lao, tanba nee bele dehan daudaun nee eskola sira husi munisípiu 13 mak programa merenda eskolar nee lao normal hanesan baibain.
“Konaba formasaun ba ita nian direjente husi eskola sira nee too agora seidauk lao, nee duni bainhira lao nee ita nian kargu xefia husi eskola sira nee bele partisipa iha formasaun refere. Kona-ba merenda eskolar iha Dili lao ona, Covalima semana oin, Viqueque lao normal, munisipiu 13 mak lao ona, Covalima semana oin mk lao, nee duni munisipiu seluk nee merenda eskolar lao diak hela,” nia afirma.
Belchior hatutan, programa refere lao diak tanba parte husi ME nian nafatin akompanha programa ida nee no husi ministériu nafatin iha linha koordenasaun neebe diak ho parte Ministériu Saude, Ministeriu Administrasaun Estatal, nunee programa ida nee bele lao diak iha eskola ida-idak.
“Ita nian estudantes sira kada loron asesu ba merenda eskolar no menu neebe ita nian eskola sira uza nee halo tuir menu manual neebe mak iha ona, fo hahan neebe nutrisaun ba ita nian estudantes sira, nunee estudantes sira mos konsumu ho aifuan, espera programa merenda eskolar bele lao diak iha eskola ida-idak,” nia haktuir.
Iha biban nee mos hatan kona-ba asuntu atu halo formasaun ba kargu xefia sira husi eskola, hanesan koordenador pre eskolar, ensinu filial no Ensinu Baziku ninia, oinsa atu mak atu implementa merenda nee ho diak ba estudantes sira, maibe formasaun nee rasik too agora seidauk lao.
“Ita nian formasaun ba kargu xefia husi eskola sira nee importante para oinsa sira bele hatene ba lalaok implementa programa merenda eskolar nee iha ida-idak nian eskola, durante nee programa merenda eskolar lao diak hanesan baibain, bainhira partisipa hotu aprendizajen iha sala, estudantes sira bele asesu ona ba merenda eskolar,” nia esplika.
Iha fatin ketak, Fundador Eskola Nobel da Paz, Jeremias P. de Jesus dehan, too ohin loron estudantes ensinu baziku Nobel da Paz la asesu programa merenda eskolar, tanba sira sei hadia hela estatutu eskola nian, bainhira seidauk iha rezultadu mak husi ME labele fo apoiu ba orsamentu ba programa refere.
“Too ohin loron ami nian estudantes ensinu baziku Nobel da Paz la asesu programa merenda eskolar, tanba sira sei hadia hela estatutu eskola nian, bainhira seidauk iha rezultadu mak husi ME labele fo apoiu ba orsamentu ba programa refere,” nia esplika.
(jac)
