DILI, STLTIMORLESTE.com – Bolsa kandidatu profesores nain 10 resin, neebe mak durante nee hanorin iha nibel ensinu baziku husi Ainaro, sira nian salariu fulan Maiu nian tama tarde, tanba sala husi konta bankaria.
Diretor Servisu Edukasaun Munisipiu Ainaro, Patricio da Costa Magno dehan, profesores nain 10 resin neebe mak durante nee hanorin iha nibel ensinu baziku iha Munisípiu Ainaro, sira nian salariu tama tarde iha fulan Maiu ninia, nee duni sira nian rezolve ona,hodi hein fulan ida nee sira nian salariu tama dala ida husi Maiu ho Junhu nian.
“Ita nian profesor sira nee balun aluga ema nian uma no balun mak kontinua hela iha komunidade sira nian uma. Durante nee profesores sira nian salariu tama diak hela, foin daudaun nee mak sira nian salariu la tama no sira nian rezolve ona, maibe agora balun nian tama ona no balun nian mak sei hein, tanba sira nian konta bankaria nee mak iha rua ka tolu, sira ba rezolve rasik iha Rekursu Umanu Nasional ME, nee duni balun agora foti ona sira nian salariu,” dehan nia ba STL liu husi telefone, Kuarta nee (24/06/2026).
Nia dehan, se kuandu la tama nafatin mak profesores sira nee sei hatoo informasaun ba parte SEM Ainaro nian, maibe balun dehan cek osan iha ona. Kona-ba osan alojamentu nian nee husi Rekursu Umanu ME nian mak bele hatene liu ba asuntu ida nee, tanba ida nee laos kompetensia SEM nia.
“Ita nian profesores nain 10 resin nian salariu tama tarde tanba sala husi sira nian konta bankaria, maibe iha 23 ho 24 Maiu nee sira rasik ba rezolve iha Dili, agora salariu pasti tama ona karik, nee duni fulan Maiu nian tama tarde, entaun tama dala ida ho fulan Junhu nian. Konaba profesores sira nian hela fatin nee mak balun aluga uma, balun hela iha maluk sira nian uma, sira nian atividades aprendizajen iha eskola lao diak hanesan baibain,” nia deklara.
Nia akresenta, dadus konaba hira mak aluga uma no hira nak hela iha komunidade sira nian uma, nee ladun hatene lo-loos no presiza identifika didiak iha terenu para bele hatene lo-loos dadus nee hira, atu nunee bele hatene diak liu tan, tanba balun hela iha distansia neebe mak dok, nunee tenke halo identifikasaun didiak ba dadus sira nee.
“Ita nian profesores sira nee balun husi Munisipiu Ainaro rasik no balun mak mai husi munisípiu seluk, nee sira tenke aluga uma, agora konaba sira nian rezidensia nee kompetensia husi Ministériu Edukasaun nian, laos husi SEM nian. Sira hanorin tuir kolokasaun ba ita nian nibel eskola neebe mak iha ona,” nia konfirma.
Iha fatin seluk, Diretor Servisu Edukasaun Munisípiu Bobonaro, Miguel Freitas hatete, kona-ba salariu profesores sira nian lao normal no kada fulan salariu tama iha kada profesores sira nian konta bankaria neebe mak iha. Agora konaba sira nian alojamentu nee husu ba iha Rekursu Umanu iha ME, tanba nee laos kompetensia SEM nian.
“Konaba salariu ba ita nian profesores sira nian lao normal no kada fulan salariu tama iha kada profesores sira nian konta bankaria neebe mak iha. Agora konaba sira nian alojamentu nee husu ba iha Rekursu Umanu iha ME, tanba nee laos kompetensia SEM nian,” dehan nia.
(jac)
