DILI, STLTIMORLESTE.com – Sekretariu Jeral Partidu FRETILIN, Mari Alkatiri hatoo testamunha klean hodi mensiona katak, Saudozu Francisco Guterres Lu-Olo nuudar lider puru, hakribi korupsaun no nuudar figura ida neebe mai duni husi povu, hodi lori dame ba rai Timor Leste. Lia fuan hirak nee hatoo bainhira fo omenajen ikus iha ritual funebre, neebe halao iha Comite Central FRETILIN (CCF).
Iha diskursu neebe nakonu ho sentimentu klean, Alkatiri hatete katak prezensa povu husi fatin oioin neebe mai fo omenajen ba saudozu Lu-Olo, nuudar realidade ida neebe labele uza lia fuan hodi kolia, maibe bele senti duni.
“Hau haree ema oioin deit atu fo omenajen deit ba saudozu Kamarada Lu-Olo. Hau hanoin fali ba kotuk bainhira hahu hamutuk ema dehan FRETILIN nee partidu aileba nian, partidu maubere nian neebe ho signifikadu partidu lahatene nian. Maibe, ohin hau haree duni realidade katak povu mai laos atu husu buat ida, sira mai tanba deit atu haree sira nia lider ba dala ikus nian no atu akompanha sira nia lider,”dehan Sekretariu Jeral FRETILIN nee, liu husi diskursu bainhira fo omenajen ikus, ba Saudozu Francisco Guterres Lu-Olo, iha CCF, Komoro, Dili, Sesta (26/06/2026).
Eis Primeiru Ministru iha Primeiru Governu no Governu da-7 nee haktuir katak, konhesimentu neebe nia hetan husi saudozu Lu-Olo mak nuudar lider ida neebe moris no boot husi família ida simples tebes, maibe nakonu ho dignidade no valour neebe aas.
Nia rekonhese katak baze moris nian husi família neebe simples nee mak forma saudozu Lu-Olo sai lider ida neebe hatene hadomi, lori dame, sai ema ida neebe puru no kontra makas pratika korupsaun.
Sekretariu Jeral FRETILIN nee mos hatoo istoria, enkontru primeira vez nian ho saudozu Lu-Olo iha Remexio (Aileu).
“Ami rua hasoru malu primeira vez iha Remexio, bainhira hau husi Remexio mai, no Komandante nian haruka bolu hau hodi ba hasoru sira. Hau buka kedan karakter ida neebe Kamarada Lu-Olo iha, tanba antes nee hau koalia deit ho nia liuhusi telefone,”hatete Sekretariu Jeral FRETILIN nee.
Nia haktuir katak, iha tempu neeba, Lu-Olo nuudar Koordenador Jeral ba Konseitu Prezidensial. Ho lojika rasik no hanoin neebe naroman , Alkatiri foti konkluzaun kedan katak Lu-Olo nuudar fuan no ran neebe mai duni husi rai no povu Timor-Leste nian.
Maski iha esperensia oioin no dalaruma mos iha prinsipiu neebe la hanesan, maibe Alkatiri sublina katak, fuan no domin ba rain nee mak kesi sira nain rua metin ba nafatin.
“Tanba nee mak ema dehan ami rua metin tebes, metin nafatin too loron neebe Maromak bolu nia,”Alkatiri sublina.
Iha fatin hanesan militante Antonio da Silva hatoo nia sentimentu triste neebe klean tebes hodi hateke ba mate isin saudozu Lu-Olo nian. Ho mata been neebe suli, Antonio hatete katak partidu FRETILIN no povu Timor-Leste lakon figura boot ida neebe sai ezemplu ba simplisidade no dedikasaun tomak ba rain nee.
Nia haktuir katak, hanesan militante no sei nafatin kaer metin ba valor puru no simplisidade neebe saudozu Lu-Olo hateten tiha ona, no promete sei lori istoria naruk neebe lider istoriku nee husik hela ba jerasaun foun sira.
(car)
