DILI, STLTIMORLESTE.com – Estudantes sira husi eskola sira iha Munisípiu Bobonaro, kada loron sira partisipa iha atividades prosesu ensinu aprendizajen ho diak.
Miguel Freitas nuudar Diretor Servisu Edukasaun Munisipiu Bobonaro informa, durante SEM vitizita eskola sira neebe mak lokaliza iha Munisípiu Bobonaro, kada loron estudantes sira partisipa diak iha ensinu aprendizajen husi manorin hirak neebe mak koloka ona, dala ruma eskola sira balun sei menus fasilidade no kondisaun eskola seidauk diak, maibe aprendizajen ba estudantes lao diak hanesan baibain.
“Iha ami nian vizita durante nee ba ita nian eskola sira kada loron ita nian atividades ensinu aprendizajen ba estudantes sira lao diak hanesan baibain, dala ruma ita nian eskola balun sei menus fasilidade, maibe aprendizajen lao tuir orariu neebe mak iha ona. Ita nian profesores sira nee ita koloka ona ba iha eskola sira, nunee kada loron sira ida-idak halao knaar tuur orariu neebe iha, nee eskola ida-idak iha nia regras,” dehan Miguel ba STL liu husi telefone, Sesta nee (26/06/2026).
Tuir Miguel, eskola iha area remotas nee balun ho distansia neebe dok malu, eskola balun ba oin presiza aumenta sala de aula, nunee halo konstrusaun foun, reabilitasaun, atu nunee bele kria kondisaun neebe diak ba estudantes sira, inklui prepara fasilidade hanesan meza no kadeira ba eskola hirak neebe sei presiza.
“Ami nafatin identifika ita nian kondisaun eskola no fasilidade iha eskola sira, atu nunee ami bele halo pedidu ba iha parte nasional, tanba ami identifika ita nian kondisaun eskola balun neebe aumenta sala, balun nibel pre eskolar, ensinu baziku no seluk tan. Ami nian linha koordenasaun servisu ho parte eskola lao diak hanesan baibain,” nia dehan.
Nia dehan, linha koordenasaun servisu nian entre SEM ho parte eskola nian diak, atu nunee iha asuntu importante ruma bele informa ba malu para husi SEM bele hatoo pedidu ruma ba iha nasional.
“Ita nian eskola iha area remotas balun seidauk diak, nunee mos eskola barak too agora laiha guarda, iha balun deit mak iha, maibe ida nee kompetensia ME nasional nian hodi haree ba iha asuntu ida nee,” nia akresenta.
(jac)
