DILI, STLTIMORLESTE.com – Sarani barak partisipa iha selebrasaun misa funebre Saudozu Eis Prezidente Republika, Francisco Guterres Lu-Olo, iha Igreja Se Katedral Dili.
Antes atu misa sarani halo orasaun neebe diriji husi Madre Guilermina Marcal, hodi hein kadaver Saudozu Francisco Guterres Lu-Olo, neebe vizita iha CCF Comoro, Kuartel Jeral F-FDTL Fatuhada no Vizta Palasiu Prezidensial Aitarak Laran hakat mai Se Katedral Dili, hodi selebra misa Funebre Saudozu Francisco Guterres Lu-Olo.
Tuir observazaun STL iha Igreja Se Katedra iha loron Sesta nee (26/06/2026), mate isin Saudozu Francisco Guterres Lu-Olo too iha Se Katedral Dili tuku 10.00 dader.
Misa funebre nee prezide husi Bispu Dom Leandro Maria Alves, akompanha husi Vigariu Jeral Arkedioseze Dili, Padre Graciano Santos Barros, Vigariu Jeral Dioseze Maliana, Padre Lucio Norberto de Deus nomos amu selebrante sira no partisipa iha misa funebre nee Prezidente Republika José Ramos Horta, Vise Primeiru Ministru, Ministru Koordenador Asuntu Ekonomiku no Ministru Turizmu no Ambiente, Franciscano Kalbuady Lay,
Eis Prezidente Tribunal Rekursu, Deolindo dos Santos, Eis Primeiru Ministru, Taur Matan Ruak ho nia oan, Jeneral Reformadu Lere Anan Timor, Xefe Estadu Maior Jeneral FALINTIL-Forsa Defesa Timor Leste (F-FDTL), Tanente Jeneral Domingos Raul Falur Rate Laek, PNTL, Diplomata, Sekretariu Jeral FRETILIN, Mari Alkatiri, seminarista, madre sira, inklui sarani iha Dili nomos husu munisipiu.
Iha misa funebre partisipa masimu husi sarani sira, tanba iha igreja laran no iha resintu igreja nian sarani sira nakonu, oinsa sira nia domin ba Saudozu Francisco Guterres Lu-Olo.
Depois misa Dom Leandro Maria Alves fo bensaun ba kaisaun no aifunan hafoin sarani ho matan-been rein, nunee hakat sai husi igreja hodi vizita ikus nian iha Parlamentu Nasional kontinua halao serimonia Funebre iha Jardim dos Herois Metinaro.
(joa)
