DILI, STLTIMORLESTE.com – Estadu Timor Leste ho familia haloot ona saudozu eis Prezidente Republika, Francisco Guterres Lu Olo, iha Jardim Herois Patria Metinaro.
Estadu Timor Leste hamutuk ho familia ohin hahu halo prosesu funebre ho ondra militar ba saudozu Eis Prezidente Republika, Francisco Guterres Lu Olo, iha semiteriu Herois Patria Metinaro.
Prosesu funebre nee akompanha husi marsa funebre nia husi FALINTIL-Forsa Defeza Timor Leste, no kaisaun taka ho Bandeira RDTL no Bandeira FRETILIN.
Loron Sesta (26/06/2026) membru Governu Timor Leste inklui entidade oin oin ho povu rihun ba rihun lori saudozu eis Prezidente Republika Francisco Guterres Lu Olo nia isin mate husi nia rezidensia ba vizita ikus CCF, Kuartel Geral F-FDTL Fatuhada, Palasiu Prezidensial kontinua ba iha igreja Katedral Dili, mai Parlamentu Nasional, depois remata estadu hamutuk familia no entidade oin oin lori saudozu nia isin hodi haloot iha Jardim Herois Metinaro.
Tuir observasaun neebe STL hetan ema rihun ba rihun akompanha saudozu husi nia rezidensia ho matan-been, laran susar tanba sira sente lakon aman luta nain ida neebe durante nee fo nia kontribuisaun makaas hodi lori rai nee ba hetan ukun rasik aan.
Iha biban nee Prezidente Republika liu husi nia diskursu hatete, ohin Timor Leste halo Minutu silensia iha Palasiu Prezidensial transmite ba mundu tomak. Sente triste tanba lakon kombatente ida Timor oan ida.
“Ohin lakon Timor oan ida povu nia oan ida kombatente ida Saudozu Francisco Guterres Lu Olo,” katak PR Horta.
Xefe Estadu hatete, Saudozu Lu Olo nia mak Laen, Aman, Belun, Kompaneiru luta nian. Nia ema ida ho konviksaun metin, neebe nunka sees aan husi ideal boot liu patria ida neebe livre, soberana no dezenvolvida.
Ba Timor-oan barak, nia reprezenta jerasaun neebe fiar bainhira buat hotu parese imposivel. Jerasaun neebe mehi ba país ida livre, luta ba mehi nee no reziste bainhira esperansa parese lakon.
“Ohin, hodi hanoin hikas nia, ita selebra misaun ida neebe kumpre ona. Lu-Olo pertense ba jerasaun ita nia eroi nasional sira-nian sira neebe hanorin katak liberdade laos prezente ida, maibe konkista ida neebe halo ho kosar-been, sakrifísiu, fakar raan, aten barani no perseveransa,” katak PR Horta.
Nia sei kontinua sai inspirasaun ba jerasaun foun sira prova moris katak bele mehi, maibe presiza luta barak, loron no kalan, atu halo mehi nee sai realidade.
“Ohin, ita fo ita-nia omenajen ba nia batalla ikus ho ai-funan no matan-been! No, hanesan Eskritura hanorin ita iha Livru Eclesiastes, rai-rahun fila fali ba rai, hanesan uluk, no espíritu fila fali ba Maromak, neebe fo nia.” katak Horta.
Eis Prezidente Republika (PR) Lu Olo hakotu nia peregrinasaun iha Hospital Prince Court, iha Kuala Lumpur, Malazia, ho tinan 71, hafoin halao tratamentu intensivu. Entretantu Francisco Guterres “Lu-Olo”, Moris iha Ossu, Munisipiu Viqueque, iha 7 Setembro 1954.
Saudozu Francisco Guterres Lu Olo, nuudar Deklarador Restaurasaun Independensia RDTL nian. Prezidente Parlamentu Nasional iha 2002 2007-Prezidente Republika 2017-2022, saudozu ho naran neebe ema hotu koinese nudar Lu-Olo, nia moris ho naran sarani Francisco Guterres.
Saudozu Lu-Olo kaben ho Cidalia Lopes Nobre Mouzinho Guterres, iha oan nain-haat, Francisco Cidalino, Eldino Nobre, Felezito Samora Guterres no Dalia Luliana Nobre Guterres.
(eme)
