DILI, STLTIMORLESTE.com – Relatoriu konsesaun eskolar ba primeiru periodu ninia nee husi parte eskola submete ona ba iha Ministériu edukasaun (ME), maibe laos hein osan ida nee too mai foin halo servisu, tanba sai funsionariu estadu iha obrigasaun la hatene kolen atu servisu.
Asuntu nee hatoo husi Diretor Eskola Sekundáriu Jeral 10 de Dezembro Comoro, Manuel Verdial ba STL iha nia knaar fatin Comoro, Segunda nee (29/06/2026).
“Konaba konsesaun eskolar ba segundu periodu ninia nee ami seidauk cek bele tama ona, maibe ami iha responsabilidade moral, laos tanba konsesaun nee mak too mai ita foin halo servisu lae, maibe tanba konfiansa ita nee profesores, ita nee funsionariu estadu, ita nee iha obrigasaun la hatene kolen atu servisu saida deit, nee duni ita tenke asegura programa nasional, bainhira konsesaun nee too mai, ita ezekuta tuir programa prioridade neebe mak iha ona,” katak nia.
Nia dehan, tenke asegura programa nasional, tanba bainhira osan nee too mai tenke aloka tuir programa neebe mak iha ona, ida nee mak sai hanesan tradisaun no sai hanesan planu prioridade neebe mak iha ona, laos tanba ho konsesaun nee mak sai hanesan haree ba planu neebe iha. Relatoriu konsesaun eskolar nee importante tebes, maibe atu halo servisu pasadu nee tenke preparadu ho diak.
“Konsesaun iha faze tuir mai nee mak ita atu haree ba programa neebe mak iha ona, tanba ita sei haree ba iha infraestrutura, nunee mos ita haree ba iha kurrikular, tanba ita presiza haree ba iha husi eskola ninia mudansa nee mak hodi bele atrai ho ema diak liu tan, nee duni bainhira ezekuta hotu presiza halo tan relatóriu ba iha ME,” nia esplika.
Nia deklara, konsesaun eskolar nee bele rezolve ona difikuldade balun neebe mak husi eskola sira hasoru, nee duni osan nee sai, sira sei tau prioridade ba iha infraestrutura eskola nian, neebe ba oin presiza atu hadia, tanba presiza kria kondisaun no prepara fasilidade ba estudantes sira iha eskola.
“Konsesaun neebe mak husi ME fo ba ita nian eskola sira nee bainhira ninia ezekusaun nee hotu, eskola ida-idak sei halo fali relatóriu ba iha ME para hodi hatene katak, osan ida nee tau prioridade ba iha saida,” tenik nia.
(jac)
