DILI, STLTIMORLESTE.com – Agora daudaun manorin sira neebe mak hanorin iha klase paralelu haat, neebe lokaliza iha Munisípiu Liquiça sufisiente hela.
Diretor Servisu Edukasaun Munisipiu Liquiça, Julio da Silva dehan, daudaun nee klase paralelu iha Munisipiu Liquiça hamutuk haat, ensinu baziku rua, ensinu sekundariu jeral ida no tekniku vokasional ida, no manorin hirak neebe mak daudaun nee hanorin iha klase paralelu haat nee sufisiente hela.
“Daudaun nee klase paralelu haat nee tekvo ida, ESJ ida no Ensinu Baziku rua, agora Sekundariu Jerál no tekvo nee ita nian bolsa kandidatu profesores nee koloka mai iha nee, nee duni ita nian manorin sira iha klase paralelu iha Munisipiu Liquiça nee sufisiente hela, ninia atividades ensinu prosesu aprendizajen kada loron lao diak hanesan baibain,” dehan Julio ba STL liu husi telefone, Segunda nee (29/06/2026).
Julio dehan, atividades ensinu aprendizajen lao diak no iha fasilidade meza no kadeira neebe mak atu bele fo apoiu ba iha ensinu aprendizajen ba estudantes sira, ho fasilidade no manorin neebe sufisiente, nee bele fasilita diak liu tan estudantes sira, nee duni estudantes neebe iha klaae paralelu nee sira nian aprendizajen lao diak hanesan baibain.
Iha fatin seluk, Diretor Nasional Ensinu Sekundariu iha ME, Benjamin Gomes da Cruz Fernandes dehan, Ministeriu Edukasaun (ME) liu husi Diresaun Nasional Ensinu Sekundáriu Jeral la aseita ba sidadaun neebe mak atu loke tan klase paralelu iha teritoriu laran.
“Tinan ida nee la eziste ona klase paralelu iha Timor laran, nee la eziste ona, nee duni klase paralelu nee ami la eziste tiha ona, eskola nee iha deit mak eskola filial individual ho sentru, nee duni laiha tan klase paralelu, neebe klase paralelu neebe mak taka ona nee taka ona, ami sei la aseita tan loke klase paralelu tuir idak-idak nian hakarak,” nia afirma.
Benjamin akresenta, klase paralelu barak mak ministériu taka ona no labele loke fali, nee duni la eziste ona klase paralelu, laos ema idak-idak loke klase paralelu tuir nia hakarak, nee labele.
Iha fatin seluk, Diretor Servisu Edukasaun Munisípiu Ainaro, Patricio da Costa Magno dehan, Servisu Edukasaun Munisipiu (SEM) Ainaro nafatin koko atu rezolve klase paralelu, no daudaun iha klase paralelu hitu (7), ninia aprendizajen lao diak hanesan baibain.
“Klase paralelu ita koko atu rezolve, tanba sira nee turma deit, ita koko atu koloka ema atu hanorin iha neeba, tanba ita rezolve oituan, ami iha klase paralelu hitu, nee ativu hela, ninia prosesu ensinu aprendizajen nee lao hanesan baibain, klase paralelu nee ba ensinu baziku deit, ninia aprendizajen lao diak hanesan baibain,” nia haktuir.
Diretor SEM Ainaro nee dehan, atividades ensinu aprendizajen iha klase paralelu nee lao hanesan baibain, oinsa prezensa estudantes sira nian ba eskola, tanba klase paralelu nee oinsa estudantes sira bele eskola, nee duni nafatin koko rezolve klase paralelu neebe daudaun nee eziste hela iha Munisipiu Ainaro.
(jac)
