BAUCAU, STLTIMORLESTE.com – Eskola Ensinu Baziku Filial (EBF) Buruma fo aula extra ba estudante sira loron Sabadu kada semana, ho objetivu atu eleva kualidade prosesu aprendizajen. Aleinde mos eskola bandu ona komunidade sira neebe faan iha areadores eskola nian, tanba fo impaktu ba implementasaun programa merenda eskolar.
Koordendor EBF Buruma, Henrique Freitas da Costa aprezenta, politika implementasaun prosesu aprendizajem extra iha loron Sabadu kada semana nee, tanba orientasaun husi Ministeriu Edukasaun neebe hakarak eleva diak liu tan kapasidade estudante sira nian iha nivel eskola publiku sira iha territoriu nasional.
“Iha ami nia EBF Buruma aula extra nee ami halao iha Sabadu kada semana para reforsa, aula extra nee iha tanba eskola iha feriadu lisaun lao tarde entaun ita halao fali iha Sabadu,” hateten Henrique ba jornalista sira iha EBF Buruma, Segunda (29/06/2026).
Nia esplika, aula extra nee parte eskola implementa hahu kedas iha trimestral dahuluk anu letivu 2026 no atual iha prosesu aprendizajem segundu trimestral nian kontinua lao, maibe falta partisipasaun husi estudante iha aula extra sei menus.
Nia komenta, partisipasaun estudante nian iha aula extra neebe realiza iha loron Sabadu kada semana estudante sira nia partisipasaun menus fo impaktu ba sira, tanba sei lakon materia, maibe parte eskola mos anota, bainhira estudante ida la partisipa iha aula extra, eskola iha dever obrigasaun bolu inan aman fo atensaun ba labarik estudante neebe la partisipa.
“Aula extra nee iha ita avizu tiha ona ba inan aman atu akompanha labarik sira mai eskola, cek labarik sira nia kadernu para hatene. Aula extra nee ba estudante sira husi primeiru siklu too terseiru siklu,” Henrique informa.
Aleinde mos nia preokupa areadores eskola EBF Buruma komunidade sira transforma sai fali fatin negosiu, tanba komunidade sira faan dosi, rebusadu no seluk tan too kedas iha areadores eskola.
“Komunidade sira nee ami fo hatene mai faan sasan nee dook husi eskola, maibe ulun toos mai faan nafatin iha eskola,” Henrique komenta.
Nia akresenta, razaun eskola bandu komunidade faan dosi, rebusadu no seluk tan iha areadores eskola, tanba atual programa merenda eskolar lao hela, nunee bele garante ijiene no evita labarik estudante sira halai sai husi sala iha momentu tempu prosesu aprendizajen lao.
“Labele faan iha nee, tanba merenda eskolar lao hela mak labarik sira moras, han merenda eskolar nee mak la ijiene ga han dosi mina sira nee mak la ijiene ita la hatene, tanba nee labele faan iha nee hodi implika ba labarik sira nia prosesu aprendizajen,” Henrique afirma.
Nia hateten, durante komunidade sira faan iha areadores eskola parte eskola bandu ona, tanba orienta husi Servisu Munisipal Edukasaun Baucau, maibe komunidade sira laiha inisiativa atu kontribui. Tanba nee sei informa ba Autoridade Suku Buruma hodi toma atensaun ba situasaun refere, tanba Suku Buruma adopta hela tara bandu, maibe komunidade laiha konsiensia kontribui regras eskola.
Entretantu total profesores iha EBF Buruma hamutuk nain 17 koresponde ba total estudante nain 500 resin kompostu pre-eskolar, primeiru segundu no terseiru siklu.
(tom)
