DILI, STLTIMORLESTE.com – Ministeriu Edukasaun (ME) rekonhese dapur neebe mak tein programa merenda eskolar iha eskola balun seidauk diak, ba oin presiza tau atensaun ba ida nee.
Haktuir Belchior Maria Almeida Barros, hanesan Xefe Departamentu Programa Merenda Eskolar iha Ministeriu Edukasaun ba STL iha nia knaar fatin, Tersa nee (30/06/2026).
“Los katak, ita nian dapur neebe mak tein programa merenda eskolar nee iha fatin balun la favorese, tanba programa sira nee kuaze ita fo ona ba iha munisipiu mak tau osan, tanba kuaze munisipiu barak halo ona planu, tanba ME nian papel ba programa merenda eskolar nee iha rua deit, ida halo monitorizasaun, ida seluk mak halo avaliasaun no fiskalizasaun ba iha implementasaun merenda eskolar,” katak nia.
Nia dehan, konaba konstrusaun nee iha nivel munisipiu idak-idak mak sei halo, tanba liu husi programa PNDS neebe mak sei establese iha kada eskola sira, nee duni dapur merenda eskolar balun too agora seidauk diak, maibe balun diak hodi fornesedor sira tein merenda eskolar ba estudantes sira.
“Agora daudaun ami nian koordenador iha nee hela husi Baucau ninia, hanesan mos informasaun neebe mak mai husi Diretor Servisu Edukasaun Munisipiu Baucau informa mai katak, ho produsaun produtu lokal iha Munisipiu Baucau nee menus tebe-tebes, dala barak ita nian implementador sira tenke hola produtu sira neebe mak laos mai hotu iha rai liur lae, balun sira tenke ba sosa iha loja,” katak nia.
Nia hatutan, ida nee mak informasaun neebe daudaun nee Diretor SEM Baucau aprezenta ona iha enkontru sira, neebe mak dehan, los duni iha Munisipiu Baucau nee produsaun ba ai-haan lokal nee sei menus no la too, tanba merenda eskolar nee implementa nee kada semana loron lima, nee loro-loron.
“Los duni ita tenke rekonhese katak, ita nian dapur merenda iha eskola balun seidauk diak duni, tanba ida nee realidade neebe mak durante nee iha, laos dapur merenda iha eskola hotu seidauk diak lae, maibe iha eskola balun neebe ninia dapur atu tein merenda nee seidauk diak no ba oin presiza hadia,” dehan nia.
(jac)
