DILI, STLTIMORLESTE.com – Livru ba disiplina balun iha Eskola Sekundáriu Jeral 10 de Dezembro Comoro, balun sei menus, maibe husi parte eskola nian hatoo ona pedidu nee ba iha Miniateriu Eduksaun (ME) para bele hetan apoiu.
Haktuir Diretor Eskola Sekundariu Jeral 10 de Dezembro Comoro, Manuel Verdial katak, konaba fasilidade meza no kadeira, inklui kaderneta eskolar ba estudantes sira sufisiente hela, laiha problema iha sira nian eskola, maibe difikuldade neebe sira enfrenta mak kona-ba livrus ba disiplina balun neebe too agora sei menus.
“Hau hanoin konaba fasilidade meza no kadeira sira nee laiha impaktu, konaba fasilidade hirak neebe mak hanesan ohin hau mensiona nee, kaderneta eskolar mos kompletu ona, laiha impaktu ba ida nee, livrus mak sei impaktu, maibe ita konsulta ona ho parte ME nasional iha parte lojistika ninia, liu-liu parte ida neebe mak halo distribuisaun ba livrus sira nee,.atu nunee bele kompleta ita nian livrus ba disiplina neebe mak sei menus nee,” dehan Diretor ESJ 10 de Dezembro Comoro, Manuel Verdial ba STL iha nia knaar fatin, Tersa nee (30/06/2026).
Nia dehan, livrus ba disiplina balun neebe sei menus, atu nunee bele halo preparasaun, tanba hanesan livrus ba disiplina lingua ingles nian no livrus ba disiplina seluk neebe too agora sei menus, nee ba oin presiza husu apoiu nafatin, atu nunee bele fasilita estudantes no profesores sira ho diak liu tan.
“Ami nian livrus ba lingua ingles, hau hanoin iha biblioteka nee balun sei menus, ami nian kaderneta kompletu hela, hanesan ohin hau dehan ona, ami nian kaderneta sira nee laiha problema,” nia dehan.
Manuel salienta, fatin ba biblioteka nee iha, maibe livrus balun mak sei menus, kada loron estudantes sira sempre asesu ba iha livrus sira nee, maibe oinsa mak husu apoiu ba iha ME para hetan apoiu livrus nee ba sira nian eskola, estudantes sira nee lee livrus hirak nee iha biblioteka neebe mak iha ona.
“Ita nian kondisaun eskola, sala balun ita hahu hadia daudaun ona, maibe ba oin ita presiza atu aumenta mos profesores ba disiplina balun sei menus hela, nuudar Diretor hatoo ona asuntu ida nee ba iha parte ME nian, atu nunee bele hetan resposta, tanba buat hotu sei lori prosesu, dala ruma ita nian pedidu ba ona,” nia afirma.
Nunee mos Luisa Martins da Costa nuudar estudantes dehan, bainhira rekreu sira sempre asesu ba livrus neebe mak iha biblioteka, oinsa sira lee halimar livrus, dala ruma iha TPC ruma, sira sempre asesu ba livrus hirak nee.
“Hau hanoin bainhira rekreu sira sempre asesu ba livrus neebe mak iha biblioteka, oinsa sira lee halimar livrus, dala ruma iha TPC ruma sira sempre asesu ba livrus hirak nee,” nia deklara.
(jac)
