DILI, STLTIMORLESTE.com – Governante sira semo ho aviaun ba rai liur beibeik, maibe povu hein rezultadu kongreta husi viajen hirak nee, tanba kustu neebe gasta seidauk refleta progresu ekonomiku neebe signifikativu iha rai laran.
Dadus orsamentu hatudu katak alokasaun ba viajen sira nee kontinua aas, enkuantu situasaun ekonomiku iha komunidade sira seidauk hatudu mudansa neebe bele sente.
Iha parte seluk, menus transperensia konaba rezultadu husi viajen sira nee hsmosu duvida seriu. Povu hein atu haree impaktu direitu husi diplomasia governante sira nian, laos deit kustu neebe fiksa iha alokasaun orsamentu, maibe rezultadu neebe bele hamenus dependensia ekonomika no hadia kualidade moris, liu liu iha area rural sira.
Observador Ekonomia, Manuel Sarmento hatoo katak, maski diplomasia ekonomika importante, maibe tenke iha balansu.Tuir nia viajen sira neebe la lori rezultadu konkreta nuudar gastu neebe la fo retornu ba Estadu.
“Governante tenke limita viajen sira neebe la lori rezultadu konkreta. Orsamentu neebe fokus liu ba viajen sira nee, diak liu aloka ba setor sira neebe bele hamenus dependensia ba importasaun,”dehan Manuel ba STL, Tersa nee (30/06/2026).
Manuel dehan, Governu presiza esabelese sistema monitorizasaun fisikal ba kualker viajen ofisial. Nia afirma katak, sinal ba falta kontrolu orsamentu nee bele lori impaktu ba konfiansa publiku nian, tanba povu presiza haree katak osan Estadu laos deit ba viajen, maibe ba dezenvolvimentu infraestrutura baziku neebe fo benefisiu ba sira nia moris loron loron.
Iha parte ketak Akademista UNPAZ, Januario Menezes alerta katak,Governu tenke iha metodu avaliasaun neebe rigorozu. Tuir nia, viajen ofisial labele sai pratika rutina neebe menus monitorizasaun.
“Ami haree katak Governu falta mekanizmu avaliasaun ba rezultadu sira. Se viajen ida nee laos ba kualifikasaun teknika ka akordu komersial neebe lori kualidade servisu publiku, nee hanesan pratika la lori benefisiu. Governante presiza hatudu responsabilidade hodi publiku bele fiar katak osan nee nuudar investimentu, laos deit gastu ba luxu diplomatiku,”afirma Januario.
Nia dehan, efisiensia iha viajen ofisial laos deit konaba hamenus kustu, msibe konaba kualidade investimentu neebe bele asegura sustentabilidade ekonomika nasaun nian iha futuru.
(car)
