DILI, STLTIMORLESTE.com – Estudantes husi Ensinu Baziku Filial (EBF) nu. 5 Comoro hamutuk 2113 sei partisipa iha avaliasaun kontinua, neebe mak halao husi kada profesores turma ida-idak.
Lia hirak nee hatoo husi Kordenador EBF nu. 5 Comoro, Marcelino Moniz hatoo asuntu nee ba STL iha nia knaar fatin, Tersa nee (30/06/2026).
“Ami iha primeiru no segundu siklu nee laiha ezame ida, maibe halao deit avaliasaun kontinua ba ami nian estudantes sira. Kona-ba ita nian preparasaun ba avaliasaun nee ita nian profesores turma ida-idak hanorin sira too ona iha kontiudu ou topiku neebe iha, nee nain mak fo deit ona, nee mak bolu dehan avaliasaun kontinua, tanba ida nee depende husi profesores turma ida-idak,” nia deklara.
Tuir nia, profesores turma hanorin estudantes ho livrus, hakerek konaba ohin loron nee hakerek konaba teste kiik ou avaliasaun, nee sira fo deit ona, ida nee mak sira foti valor husi avalasaun kontinua ninia hodi bele hakerek iha kaderneta eskolar husi kada estudantes ida-idak nian neebe iha ona.
“Ita nian numeru estudantes nee nafatin, hamutuk 2113 nee hahu husi estudantes primeiru ano too iha sestu ano ninia. Ita nian sala ensinu aprendizajen 47. Dezafiu seluk neebe mak ami infrenta mak kona-ba ami nian sala aprendizajen neebe daudaun nee presiza hadia, tanba balun antigu liu ona, maibe hetan ona survei husi kompanhia balun neebe mai halo tender, maibe ami ba cek too iha Ministeriu Edukasaun, sira dehan sei realiza konstrusaun nee iha tinan 2027,” nia dehan.
Marcelino akresenta, difikuldade seluk laiha, tanba atividades prosesu aprendizajen kada loron ba estudantes sira lao normal hanesan baibain no profesores sira tama aula tuir regulamentu neebe mak iha ona, tanba nee atividades hotu lao diak tebes iha sira nian eskola, estudantes sira dader mai eskola, hodi partisipa iha aprendizajen husi kada profesores turma ida-idak, tanba nee sira nian estudantes sei partisipa deit iha avaliasaun kontinua.
(jac)
