MANATUTO, STLTIMORLESTE.com – Durante loron 22 ona estudante hamutuk nain 735 husi eskola Ensinu Bazika Sentral (EBC- Sigla Português) kompostu primeiru, segundu no terseiru siklu Hatumetac iha Postu Administrativu Laclo, Munisipiu Manatuto, la asesu Programa Merenda Eskolar (PME).
Xefe Gabinete Tekniku Administrasaun no Responsavel Programa Merenda Eskolar, Eulania Soares aprezenta, prosesu aprendizajen anu letivu 2026 hahu iha fulan Janeiru, iha neebe tuir kalendariu implementasaun programa merenda eskolar hahu iha fulan inisiu too Abril, maibe implementasaun programa refere lao la efetivu, tanba fulan Marsu responde deit ba loron efetivu 10 no fulan Abril responde deit ba loron efetivu 11 iha trimestral dahuluk. Enkuantu ba fila fali iha trimestral daruak implementa deit iha loron efetivu 18 iha fulan Maiu.
“Fulan Junhu nian iha 22 dias, maibe osan ami nian seidauk tama iha konta bankaria eskola nian, tanba nee paradu tiha,” hateten Eulania Soares ba STL iha EBC Hatumetac Laclo, Tersa (30/06/2026).
Nia esplika, durante fulan Junhu ba trimestral daruak neebe iha EBC Hatumetac, programa merenda eskolar la lao ba loron efetivu 22 nian no programa refere la lao, laos kestaun iha parte eskola, tanba hafoin remata loron efetivu 18 fulan Maiu nian, parte eskola submete kedas pedidu kontinuasaun ba Servisu Munisipal Edukasaun Manatuto, maibe eskola la hetan alokasaun orsamentu iha fulan refere.
Nia komenta, durante loron efetivu 22 implementasaun programa merenda eskolar paradu iha eskola EBC Hatumetac nee no konsidera parte Autoridade iha nivel Munisipal halakon estudante sira nia direitu iha programa refere.
“Programa merenda eskolar nee ba ami diak tebes, labarik sira iha vontade atu aprende, tanba liu husi hahan sira nee sira iha forsa partisipa iha prosesu aprendizajen, maibe fulan Junhu paradu, ami mos preokupa, maibe nee responsabilidade parte munisipiu nian,” Eulania argumenta.
Responsavel PME iha EBC Hatumetac nee husu Autoridade Munisipal Manatuto no Servisu Munisipal Edukasaun Manatuto atu monitoriza kalendariu implementasaun programa merenda eskolar iha Munisipiu Manatuto, tanba orsamentu neebe Governu aloka ba implementasaun programa merenda eskolar anual, maibe iha Munisipiu Manatuto iha anu letivu 2026 trimestral dahuluk failha nomos iha trimestral daruak nian, nunee husu alokasaun orsamentu husi munisipal ba eskola sira tenke aselera prosesu sira hodi la fo impaktu ba implementasaun programa refere iha nivel eskola.
Iha fatin hanesan, estudante Carla A. Fátima Soares espresa sentimentu triste, tanba implementasaun programa merenda eskolar sai programa garantia ba estudante sira, iha tempu dader ladun preokupa ona matabisu iha uma, tanba eskola iha merenda eskolar neebe atu auguenta estudante sira nia estomuk partisipa iha prosesu aprendizajen, maibe garantia nee la responde masimu estudante sira nia nesesidade.
“Ami senti triste tanba iha ami nia eskola dala ruma han tiha para derepente deit, agora fulan ida ona ami la han, tanba ema la tein ona,” katak estudante Carla.
Enkuantu estudante Nonu Ano, Isaíus Gracia de Araújo husu ba Autoridade Munisipal ho nia Diresaun Servisu Munisipal Edukasaun Manatuto atu hadia sistema alokasaun orsamentu no hadia implementasaun programa merenda eskolar. Tanba implementasaun programa refere iha anu letivu 2026 lao la efetivu no fulan ida programa refere iha eskola EBC Hatumetac paradu.
“Ami la han senti triste, tanba nee husu para ami atu han fila fali iha ami nia eskola hanesan baibain,” Isaíus rekomenda
Entretantu EBC Hatumetac iha total estudante benefisiariu ba PME 504 ho nia EBF Marmere rejistu estudante nain 88, EBF Beheda’a 85 no pre-eskolar rejistu estudante nain 58, neebe tuir planu sei asesu fali PME iha loron 01 Julhu 2026 ba loron efetivu 10.
(tom)
