MANATUTO, STLTIMORLESTE.com – Eskola Ensinu Bazika Sentral (EBC- Sigla Português) kompostu primeiru, segundu no terseiru siklu Hatumetac iha Postu Administrativu Laclo, Munisipiu Manatuto, iha fasilidade ba bee moos, maibe seidauk asesu bee moos, tanba nee estudante tenke lori bee husi uma ba eskola utiliza iha fatin sanitasaun no utiliza ba programa merenda eskolar, parte eskola tenke sosa husi komunidade neebe faan bee moos.
Estudante Nonu Ano, Carla A. Fátima Soares aprezenta, EBC Hatumetac iha fasilidade hanesan tanki bee nian iha portaun entrada ba areadores eskola nian, iha neebe fasilidade nee estabele atu fasilita estudante sira atu asesu bee moos utiliza ba nesesidade hanesan fase liman no seluk tan, maibe laiha bee.
“Iha ami nia eskola nee laiha bee moos duni, entaun ami mai eskola tenke kuru bee husi uma agua boot nee ida lae rua,” hateten estudante Carla A. Fátima Soares ba STL iha EBC Hatumetac Laclo, Tersa (30/06/2026).
Nia espresa, lori bee husi uma ba eskola laos kada loron, maibe bainhira haree bee iha fatin sanitasaun nian laiha ona, hanesan estudante iha obrigasaun lori bee husi uma ba eskola kada estudante ida lori bee iha agua boot nee rua ou ida, nunee bele utiliza iha eskola bainhira nesesidade obriga.
Ba estudante nee katak, laiha problema ba sira lori bee husi uma ba eskola, maibe husu Ministeiru Edukasaun atu kanaliza bee moos ba eskola refere, tanba eskola edifisiu publiku.
“Ami lori nee husi uma mai diak hotu, maibe ami tauk mak bee neebe ami lori mai eskola hotu mak bainaka ida mai nesesidade obriga ita halo oinsa,” dehan nia.
Iha fatin hanesan, estudante Nonu Ano, Isaíus Gracia de Araújo mos hateten, “iha ami nia eskola laiha bee moos, ami husi uma mai tenke kuru iha agua lori mai eskola,” nia argumenta.
Enkuantu Xefe Gabinete Tekniku Administrasaun, Eulania Soares rekonhese iha eskola EBC Hatumetac laiha bee moos atu fasilita estudante sira no utiliza ba tein merenda eskolar nian, tanba nee durante implementasaun programa merenda eskolar, parte eskola hasai osan merenda eskolar nian sosa bee moos husi komunidade hafoin tein ba estudante benefisiariu sira iha eskola refere.
“Eskola ida nee rasik infrenta bee moos, ami tein iha eskola tenke kontratu ho komunidade bee nain, tanba komunidade sira dada privadu entaun tein loron 10 nian ami selu ba bee US$ 15 se 20 dias ami fo US$ 30 ba sira,” Eulania informa.
Nia komenta, relasiona eskola EBC Hatumetac infrenta problema bee moos, parte Servisu Munisipal Edukasaun Manatuto rekoilha ona kondisaun sira, maibe seidauk iha resposta, tanba nee atual eskola utiliza osan husi konsensoens eskolar hodi sosa bee utiliza iha fatin sanitasaun no seluk mak motiva estudante lori bee husi uma ba eskola, bainhira bee menus no osan konsensoens eskola tarde.
Entretantu EBC Hatumetac iha total estudante benefisiariu ba PME 504 ho nia EBF Marmere rejistu estudante nain 88, EBF Beheda’a 85 no pre-eskolar rejistu estudante nain 58.
(tom)
