DILI, STLTIMORLESTE.com – Kultura Timor nia mak respeita no valoriza malu, maibe ohin loron atitude sira nee hahu mihis ona, buka hatun malu iha media sosial.
Feto Potensial, Maria Amaral ba STL iha nia knaar fatin Manleuana, Kuarta nee (01/07/2026) hatete, nuudar sidadaun Timoroan sente triste haree situasaun neebe daudaun nee akontese iha rai laran, los duni katak nasaun demokrasia maibe presiza mos valoriza kultura Timor nia respeita malu, karik iha buat ruma naksalak bolu malu koalia, laos uza media hodi insulta malu.
“Ita triste tanba iha media sosial ema uza insulta malu, satan balun uza media sosial ho ID falsu trata ita nia lider sira, neebe lo-loos ita valoriza no tane maibe tanba diferente idea ita uza hodi trata malu, no ita haree kultura Timor nia ida respeita malu no valoriza malu hahu mihis daudaun ona,” dehan Maria.
Nia hatutan, nasaun demokrasia bele espresa sentimentu ruma nee normal, maibe labele espresa ho liafuan tolok no insulta malu iha media sosial, ida nee hatudu ezemplu neebe la diak iha publiku.
Nunee mos eis Prezidente Rede Feto, Judite Dias Ximenes hatete, Timor iha kultura respeita malu nee sai valor neebe boot, ezemplu kiik respeita ema neebe boot no boot hatudu ezemplu ba kiik sira, maibe ohin loron kultura ida valoriza malu hahu mihis daudaun ona, lider sira mos dala ruma la valoriza malu, entaun kiik sira dala ruma uza fali buat sira nee insulta malu fali iha media media sosial no pior liu tan tolok no trata malu iha media sosial.
Tanba nee, nia husu ba hotu hotu tane aas nafatin kultura Timor nian, iha buat ruma naksalak bolu malu koalia ba malu hakoak malu nuudar maun no alin, laos la gosta malu buka insulta malu fali iha media ka la foo oin ba malu.
“Tanba nee husu hotu hotu tane aas valores no kultura Timor nian, hadomi no respeita malu tane malu, karik buat ruma naksalak bolu malu koalia ba malu nuudar maun no alin, aman no oan,” katak nia.
Nunee mos Madre, Guilhermina Marcal hatete, daudaun nee ema nia prinsipiu valores humanu nuudar ema sidadaun neebe haraik aan respeitu malu hahu mihis ba daudaun, tanba hakruuk liu ba teknolojia.
Husik espasu lakon tiha prinsipiu valores fundamental neebe sai hanesan empoderamentu karakter povu Timor Leste nian menus ho buat ida naran bandalismu global, deskulpa hau dehan bandalismu global tanba ita hakruuk liu ba buat ida naran teknolojia, neebe dehan katak o mos o, hau mos hau, espiritu familia nia koletividade iha familia iha repartasoens iha fatin seluk nee ita menus oituan tanba hahalok ida nee,” dehan Madre Guilhermina.
Madre dehan, se fila reflete didiak hanesan ema profesor, doutor, padre sejuita ida dehan “O halo o nia aan sai ida neebe diak liu atu husik espasu ema seluk tau matan ba o,” tau matan nee laos dehan I love you lae, tau matan nee katak fo hanoin diak atu fortifika liu tan aan bele sai diak liu iha instituisaun iha rai doben Timor Leste.
“Ida nee lori ita tama klean liu tan sai ita nia aan moris ida neebe iha personalidade rasik, saida mak hau halo hau bele halo, no saida mak hau labele halo hau labele halo,” katak Madre.
Iha biban nee madre hatutan tan katak, ema presiza koletividade fraternidade, espiritu irmanidade katak bolu malu, fo hanoin ba malu, kuandu hakarak servisu neebe lao diak mak responsabilidade moral mak fo hanoin malu, laos nia halo aat tiha mak seluk hamnasa no tau iha media katak nia loron loron hanesan nee, ida nee laos responsabilidade, integridade, servidor neebe diak ba nasaun nia maibe ida nee fo sai liu perspektiva individualizmu mak boot liu fali misaun neebe halao durante nee.
(eme)
