DILI, STLTIMORLESTE.com – Ministeriu Saude (MS) kondena makaas hahalok imoral, laiha responsabilidade neebe halao husi ID falsu hirak neebe hakerek narativu defamasaun ba dirijente masimu ministeriu nian.
Liu husi pajina media Palasiu das Sinzas, Segunda nee (01/07/2026) hatete, informasaun neebe publika husi ID falsu ho naran Fukun Timor News no Soares Bubulisis Post nee lalos, falsu i hoax. Tanba nee Ministeriu Saude sei submete autor ka nain ba ID falsu hirak neebe mak rejistradu hodi prosesa tuir lei neebe vigor.
Ministeriu Saude kondena makas ho hahalok ID falsu hirak nee, relasiona ho publikasaun naratifu husi ID falsu Fukun Timor News neebe dehan, “Ministra Elia ba Portugal partisipa Primeiru Ministru Xanana nia festa, lakohi selu tusan. Gasta osan estadu hodi pasear iha Portugal. Elia Amaral ho delegasaun nain 7 mai Lisboa ha loron 19 fulan Junu to 24 Junu hodi pasear iha Lisboa.
Elia amaral aporveita nia asuntu servisu iha paris loron 25 Junu ho delegasaun nain 7 mai uluk Lisboa iha loron 19 too 24 junu hodi pasear no lori ninia sasan privada mai Lisboa.
Iha pasear nee uza osan estadu nomos halo kazu hodi halo moe estadu TL iha Lisboa to polisia Portugal tun resolve. Elia Amaral komete kazu halo moe estadu TL mak hanesan aluga kareta VAN (9 passengers) 2ho presu loron ida 400 euros (€) durante loron 6; €400×6=€2400×2 (kareta) =€9600 ikus mai Ministra lakohi selu no kompania kareta telfone polisia hodi resolve.
Elia mos uza osan estadu hodi selu ninia bagajen neeb nakonu ho ninia sasan privada neebe atu lori mai ense iha nia uma neebe foin hola iha Lisboa. Osan montante neebe Elia uza hodi selu bagajen mak US$ 3.500.
Elia nia viajem mai Lisboa hodi partisipa festa Xanana nia tinan no pasear hare Elia nia uma foin sosa iha Lisboa.
Iha sorin seluk, tuir Sidadaun Carmelita do Carmo hatete, labele tan deit la gosta no laran moras ema, hodi halo defamasaun iha media sosial. Media sosial nee ema uza para asesu informasaun aktual rai laran no rai liur, laos atu akuza no hatete aat fali ema seluk.
“Presiza kontrola ID falsu sira neebe gosta halo defamasaun ba ema seluk nee, liu-liu sira neebe gosta tula ibun ba lider nasional hanesan Ao Nana, Avo Mari, Avo Horta no sira seluk tan. Husu ba PSIK no Polisia atu buka tuir ema sira neebe uza ID falsu, atu prosesa tuir lei neebe iha,” dehan nia.
Nia hatutan, ema sira uza ID falsu hodi trata no halo defamasaun ba ema seluk, ema nee dala ruma laiha edukasaun husi familia mak toman aat ho hahalok sira hanesan nee.
(dom)
