DILI, STLTIMORLESTE.com – Timor Leste (TL) adere ona ba ASEAN, nunee Ensinu Superior prontu halo kompetisaun ho universidade sira iha rai liur.
Asuntu nee hatoo husi Reitor Instituto Ciensia Saude (ICS), Leao Borges ba STL iha nia knaar fatin, Kinta nee (02/07/2026).
“Los duni katak, nee mos presiza preparadu no prontu para atu kompete, nee duni prontu atu kompete nee mak ita nian preparasaun nee liu-liu lingua ingles no português, nee mak agora daudaun tuir hela kursu ba lingua português ho lingua ingles, depois ita nian estudantes sira mos hanesan, ita presiza hadia mos atividades ensinu aprendizajen ba ita nian estudantes sira,” nia afirma.
Nia dehan, atu hadia ensinu aprendizajen nee mak hanesan estudantes sira labele simu deit teoria, maibe tenke halo mos pratika, rua nee tenke kompleta malu, ida nee mak koalia kona-ba kualidade, nunee bele kompete ho universidade neebe mak iha rai liur, nunee mos halo servisu voluntariu.
“Agora daudaun ami nian ekipamentus neebe mak estudantes sira atu halo pratika nee kompletu hela, tanba ami nian estudantes sira laos simu deit teoria, maibe sira halo mos pratika, tanba ami nian ekipamentus pratika nian sufisiente, tanba ho subvensaun neebe mak ami hetan husi governu liu husi MESSK, nee bele fasilita ami, oinsa mak ami bele sosa ekipamentus pratika nian,” nia deklara.
Reitor ICS nee hatutan, hadia nafatin kualidade iha ensinu superior, neebe mak daudaun nee haruka dosentes sira kontinua sira nian estudu iha rai liur, balun iha Indonezia, Brazil no Portugal, tanba nee prepara Rekursu Umanu hirak nee hodi bele kompete ho universidade sira iha rai liur no dosentes hirak neebe daudaun nee ho nibel S1, nee haruka sira ba kontinua sira nian estudu iha nivel mestradu ninia.
“Ami iha departamentu lima, ami nian ekipamentus pratika nian kompletu, tanba ami nian estudantes sira halo pratika, nee depende ba sira nian dosentes ba materia nee, aleinde simu teoria nunee halo mos pratika, rua nee tenke kompleta malu, tanba TL adere ona ba ASEAN, nee Ensinu Superior iha TL presiza halo kompetisaun ho universidade rai liur,” dehan nia.
Nunee mos Reitor ISC, Sebastião Pereira dehan, TL adere ona ASEAN nee Instituisaun Ensinu Superior sira sei halo kompetisaun ho ensinu superior sira rai liur, nee hakarak ka lakohi tenke iha kompetisaun.
“TL adere ona ASEAN, nee Instituisaun Ensinu Superior sira sei halo kompetisaun ho ensinu superior sira rai liur, nee hakarak ka lakohi tenke iha kompetisaun, nee duni ita nafatin hadia ita nian kualidade iha ensinu superior,” nia afirma.
(jac)
